AQSh Ukrainadagi elchixonasini vaqtincha Kiyevdan Lvovga ko‘chirib turadi. Bu haqda davlat kotibi Entoni Blinken ma’lum qildi.
Blinkenning so‘zlariga ko‘ra, xodimlar Ukrainadagi vaziyatni yumshatish bo‘yicha diplomatik sa’y-harakatlarni muvofiqlashtirish bo‘yicha o‘z vazifalarini, shuningdek, mamlakat rasmiylari bilan aloqalarni qo‘llab-quvvatlashni davom ettiradi.
The Wall Street Journal’ning yozishicha, boshqa shaharga ko‘chirilayotgani sabab diplomatik missiyaning Kiyevdagi binosida joylashgan kompyuterlar va tarmoq apparatlari yo‘q qilinadi.
AQSh Davlat departamenti 12-fevral kuni o‘ta muhim bo‘lmagan lavozimda ishlovchi diplomatlardan Ukrainani tark etishni talab qildi. O‘shanda idora qolgan xodimlarda Kiyevda ishlashni davom ettirishini ma’lum qilgandi.
Kiyevdagi elchixonalarning xodimlari Lvovga ko‘chirilishi haqida bundan oldin boshqa g‘arb davlatlari, xususan, Kanada, Avstraliya va Niderlandiya ham e’lon qilgan. Germaniya Ukrainaning sharqiy qismidagi Dnepr shahri joylashgan bosh konsulligini ko‘chirgan.
Tobora taranglashib borayotgan Rossiya—Ukraina o‘rtasidagi vaziyat ortidan ko‘plab mamlakatlar o‘z fuqarolarini Ukrainani zudlik bilan tark etishga chaqirmoqda. 10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etdi. AQSh prezidenti Jo Bayden Ukrainadagi barcha amerikaliklarni hoziroq mamlakatdan ketishga chaqirdi. AQShdan keyin Niderlandiya, Chernogoriya, Yaponiya, Latviya, Buyuk Britaniya va Janubiy Koreya ham fuqarolaridan Ukrainaga bormaslikni so‘radi.
Politico manbalari aynan 16-fevral sanasini AQSh prezidenti Jo Bayden NATOdagi ittifoqchilariga Rossiya agressiyasi boshlanishining norasmiy sanasi sifatida ko‘rsatgani haqida xabar bergandi. Zelenskiy AQSh taxmin qilgan hujum sanasini Ukraina birligi kuni deb e’lon qildi.
Izoh (0)