Avvalroq Markaziy bank O‘zbekiston milliy valyutasi – so‘mning grafik belgisini yaratish bo‘yicha tanlov e’lon qilgani haqida xabar berilgan edi.
Ko‘plab boshqa valyutalardan farqli o‘laroq o‘zbek so‘mining grafik belgisi mavjud emas va bo‘lmagan ham. Qisqartma sifatida “so‘m” yoki “sum” so‘zlari, UZS harflaridan iborat belgi yoki 860 raqamidan foydalanib kelingan.
Biroq Toshkentdagi USSO Design agentligi tomonidan 2013-yildayoq so‘mning grafik belgisi konsepti yaratilgan edi.
“S” harfining asosida 45° burchak ostida belgilangan ikki parallel chiziq tasvirlangan. Yaratuvchilarning so‘zlariga ko‘ra, ushbu chiziqlar o‘sish belgisini, shuningdek, har qanday jahon valyutasiga xos bo‘lgan ko‘tarilish va tushish kabi ikki yo‘nalishni ifodalaydi.
Mazkur g‘oya g‘oyaligicha qolib ketgan. Endilikda esa so‘m birinchi marta o‘zining grafik belgisiga ega bo‘ladi. Tanlov bo‘yicha ishlar 31-martgacha qabul qilinadi.
Markaziy bankda belgi o‘zbek so‘mini jahon miqyosida tan olinishi va moliyaviy bozorlardagi uning xalqaro nufuzini oshirishini ta’minlashi kutilmoqda.
Izoh (0)