O‘zbekiston Markaziy banki milliy valyuta belgisini yaratish bo‘yicha “So‘m belgisi” tanlovini e’lon qildi.
Tanlovda mamlakat milliy valyutasining xalqaro miqyosda o‘ziga xosligi, xalqimizning madaniy qadriyatlari va boshqalardan ajralib turuvchi xususiyatlarini ifodalovchi eng yaxshi grafik ishlar aniqlanadi.
Ishtirok etish uchun 2022-yil 31-martga qadar ariza, o‘z g‘oyangiz tasviri va konsepsiyasi bilan birgalikda tanlov@cbu.uz elektron manziliga yuborish lozim.
G‘olibga Markaziy bank tomonidan pul mukofoti taqdim etiladi.
Tanlov qoidalari bilan bu yerda tanishib chiqish mumkin.
O‘zbek so‘mi birinchi marta o‘z belgisiga ega bo‘ladi
Ko‘plab boshqa valyutalardan farqli o‘laroq, o‘zbek so‘mining grafik belgisi mavjud emas va bo‘lmagan ham. Qisqartma sifatida “so‘m” yoki “sum” so‘zlari, UZS harflaridan iborat belgi yoki 860 raqamidan foydalanib kelingan.
MDX hududida arman drami (֏), Ukrain grivnasi (₴), Ozarbayjon manati (₼), qozoq tangasi (₸), qirg‘iz so‘mi (⊆), Rossiya rublining (₽) grafik belgilari mavjud.
Eng mashhur valyuta belgisi dollar hisoblanib, u XVIII asrning 70-yillari oxirida rasmiy yozishmalarda zamonaviy ko‘rinishda paydo bo‘lgan.
Izoh (0)