Pentagon yaqin kunlarda Polshaga yana 3 ming nafar harbiy xizmatchi yuboradi, deb xabar beradi Deutsche Welle.
Reuters agentligi ma’lumotlariga ko‘ra, gap Shimoliy Karolina shtatidagi 82-havo-desant bo‘linmasining harbiylari haqida ketmoqda. Agentlik manbasining ta’kidlashicha, buyruq Pentagon rahbari Lloyd Ostin tomonidan AQSh prezidenti Jo Baydenning ko‘rsatmasiga asosan imzolangan.
Avvalroq ushbu bo‘linmaning 1,7 ming harbiy xizmatchisi Polshaga joylashtirilgandi. Ular Ukrainaning Lvov viloyatidan 90 kilometr uzoqlikda joylashgan Jeshuv shahri aeroportida kelgan.
Shu kunning o‘zida AQSh Harbiy-havo kuchlari F-16 jangovar samolyotlari Germaniyadan Ruminiyaga ko‘chirilishini ma’lum qildi. Ular Qora dengizdan 100 kilometr naridagi Feteshti aviabazasiga joylashtiriladi. Nechta qiruvchi samolyot ko‘chirilayotgani oshkor etilmagan.
Samolyotlar ekipajlari “Rossiyaning harbiy jihatdan Ukraina yaqinida kuchayishi oqibatida yuzaga kelgan hozirgi keskinlik davrida mintaqaviy xavfsizlikni mustahkamlash uchun Qora dengizdagi ittifoqchilar bilan yaqindan hamkorlik qiladi”.
Eslatib o‘tamiz, 24-yanvar kuni AQSh Davlat departamenti Amerikaning Kiyevdagi elchixonasi xodimlarining bir qismini, oilalarini esa to‘liq evakuatsiya qilmoqchiligini ma’lum qildi. Bundan tashqari, Davlat departamenti AQSh fuqarolarini Ukrainani tark etishga chaqirdi. Buyuk Britaniya va Avstraliya ham Kiyevdagi diplomatlarining oilalarini evakuatsiya qilishni boshladi.
Vladimir Zelenskiy avval ham ikki marta ukrainaliklarga Rossiya bosqinining ehtimoli yuzasidan murojaat qilgan. U xalqini vahimaga berilmaslikka chaqirgan.
Izoh (0)