Ukraina prezidenti Vladimir Zelenskiy fuqarolarga murojaat bilan chiqib, yana bir bor vahimaga tushmaslikka chaqirdi. Davlat rahbarining mamlakat Milliy xavfsizlik va mudofaa kengashi yig‘ilishidan keyin qilgan bayonotidan parchalar uning Telegram’dagi kanalida e’lon qilingan.
Uning so‘zlariga ko‘ra, mamlakat sharqidagi vaziyat nazorat ostida, “vahimaga o‘rin yo‘q”.
“Biz vaziyatni tinch yo‘l bilan tartibga solish orqali keskinlikni to‘liq yumshatish ustida ishlayapmiz. Barchasidan xabardor bo‘lgan holda hammasiga tayyormiz, biz eng yaxshisiga ishonamiz hamda sheriklarimiz, diplomatlarimiz va harbiylarimiz bilan birgalikda zarur barcha narsani qilyapmiz. Ular bizni himoya qilyapti, biz esa ularni himoya qilishimiz kerak”, — deydi Zelenskiy o‘z murojaatida.
Davlat rahbari tinchlik saqlab, “to‘g‘ri kelgan gapni aytavermaslikni” so‘ragan. Isitish mavsumi haqida gapirar ekan prezident gaz va ko‘mir zaxirasi yetarli ekanini bildirgan.
Shuningdek, Ukraina yetakchisi koronavirus pandemiyasi mavzusiga ham to‘xtalib o‘tgan. Uning so‘zlariga ko‘ra, kasallanish holatlari ortib borayotganiga qaramay, shifoxonalarning 28 foizininggina koykalari band. U vaksinaning uchinchi — buster dozasi bilan emlanganlarga 500 grivnada (17,6 dollar) va’da qilgan.
Zelenskiy avvalroq ham Rossiyaning ehtimoliy bosqini sabab ukrainaliklarni vahimaga tushmaslikka chaqirgan edi. “Urush sakkiz yildan beri davom etyapti, hozir vahima qilish, vaziyatni keskinlashtirish, grechka va gugurt sotib olish vaqti emas”, — deydi u.
Avvalroq NATO Ukraina atrofidagi vaziyat sabab qo‘shinlarini jangovar shay holatga keltirishi, AQSh Davlat departamenti Kiyevdagi diplomatlarning oilalarini evakuatsiya qilishni boshlagani, AQSh Ukrainaga yana 80 tonna qurol-yarog‘ yetkazib bergani to‘g‘risida xabar berilgandi.
Izoh (0)