Turkmanistonda muddatidan oldingi prezidentlik saylovlarini 12-martda o‘tkazish rejalashtirilmoqda. Bu haqda respublika Markaziy saylov komissiyasi raisiga tayanib, “Interfaks” xabar berdi.
11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov boshqaruvchi yoshlarga topshirish va faoliyatini Xalq maslahati raisi sifatida davom ettirish borasidagi niyatini ma’lum qilgan.
Xalq maslahatining navbatdan tashqari yig‘ilishida so‘zga chiqqan faxriy oqsoqollar prezident Berdimuhamedovning mamlakat rahbariyatiga yosh kadrlarni jalb etish to‘g‘risidagi qarorini qo‘llab-quvvatlagan. Keyinroq u Markaziy saylov komissiyasiga muddatidan oldin prezidentlik saylovlarini o‘tkazishga tayyorgarlikni boshlash bo‘yicha topshiriq bergan.
Turkmanistonning amaldagi prezidenti Gurbanguli Berdimuhamedov 2017-yilning 12-fevralida davlat rahbarligi lavozimiga tayinlangandi. O‘shanda unga saylovchilarning 97,69 foizi ovoz bergan — 3 163 692 kishi. Davlat rahbari saylovi muqobillik asosida o‘tkazilgan, oliy davlat lavozimiga to‘qqiz nafar nomzod da’vogarlik qilgandi.
Turkmaniston konstitutsiyasiga muvofiq prezident 7 yil muddatga saylanadi. Navbatdagi prezidentlik saylovlari 2024-yilda o‘tkazilishi kerak edi.
Eslatib o‘tamiz, 2021-yilning martida Turkmaniston prezidenti Berdimuhamedov konstitutsiyaga zid ravishda parlament a’zosi etib saylangani xabar berilgan edi. 2020-yil sentabr oyida qabul qilingan yangi tahrirdagi Turkmaniston konstitutsiyasining 73-moddasiga muvofiq, prezident Turkmaniston Milliy kengashining a’zosi yoki deputati bo‘lishi mumkin emas.
Izoh (0)