AQSh davlat kotibi Entoni Blinken Rossiyaning Ukrainaga bosqini istalgan vaqtda, jumladan, Pekindagi Olimpiada o‘yinlari yakunlanguniga qadar boshlanishi mumkinligini ma’lum qildi, deb xabar beradi Reuters.
AQSh prezidentining milliy xavfsizlik bo‘yicha maslahatchisi Jeyk Sallivan ham shunga o‘xshash bayonot bilan chiqdi. Uning Amerika razvedkasi ma’lumotlariga tayanib aytishicha, Rossiya hujumni havo orqali boshlashi va mojaro vaqtida Kiyevga hujum qilishi mumkin.
Der Spiegel’ning yozishicha, MRB va Amerika harbiylari NATOga a’zo davlatlarni Rossiya bosqinchilik harakatlarini 16-fevral kuni boshlashi mumkinligi borasidagi o‘z xavotirlari haqida ogohlantirgan.
Rossiya tashqi ishlar vazirligining rasmiy vakili Mariya Zaxarova o‘zining Telegram’dagi kanali orqali Amerika hukumatining bayonotini “jazavaga tushish” deb atagan.
12-fevral kuni Rossiya prezidenti Vladimir Putin va AQSh prezidenti Jo Bayden telefon orqali muloqot qiladi.
Avvalroq Niderlandiya, Chernogoriya, Yaponiya va Janubiy Koreya o‘z fuqarolariga Ukrainaga bormaslikni tavsiya qildi va u yerda bo‘lganlardan mamlakatdan chiqib ketishni so‘ragandi. 10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etgan. AQSh prezidenti Jo Bayden Ukrainadagi barcha amerikaliklardan hoziroq mamlakatdan ketishni so‘ragan.
Izoh (0)