Toshkentda Nexia’ni olib qochgan 12 va 16 yoshli bolalar ushlandi

Toshkent shahri Bektemir tumanida voyaga yetmagan bolalar avtomobilni olib qochdi. Bu haqda Tergov departamenti xabar qildi.

Qayd etilishicha, 7-fevral kuni soat 06:43 da Bektemir tumani bo‘yicha IIO FMB Navbatchilik qismiga xabar kelib tushgan. Unga ko‘ra, noma’lum shaxs Suvsoz dahasi “Rohat” mahallasi 47-uy oldidagi avtoturargohda T.R. (65 yoshli)ga tegishli Nexia-1 avtomashinasini qarovsiz, eshiklari qulflanmagan va kaliti o‘t oldirgichda qolganidan foydalanib, noma’lum tomonga olib qochgan.

Olib borilgan tezkor-qidiruv tadbirlar natijasida jinoyatni voyaga yetmagan Sh.R. (12 yoshli) va F.D. (16 yoshli) sodir etgani aniqlangan. Avtomashina Bektemir tumani Ohangaron shohko‘chasi Chirchiq daryosi ustidagi avtomashinalar o‘tish uchun mo‘ljallangan ko‘prik ustida qoldirib ketilgan.

Aniqlanishicha, bolalar ko‘prik ustida avtomashinaning yonilg‘isi tugab qolgani sabab yashirinmoqchi bo‘lgan vaqtida xizmat vazifasini bajarib kelayotgan patrul-post xizmati xodimlari tomonidan ushlangan.

Holat yuzasidan Jinoyat kodeksining 267-moddasi (transport vositasini olib qochish) bilan jinoyat ishi qo‘zg‘atilgan. Hozirda tergov harakatlari davom etmoqda.