Surxondaryo viloyatining Qiziriq tumanida gazdan noqonuniy foydalanib kelgan metan-zapravkalardan biri aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Qiziriq tuman bo‘limi tomonidan “Hududgaz Surxondaryo” gaz ta’minoti filialining murojaatiga asosan tergovga qadar tekshiruv o‘tkazilgan. Tekshiruv davomida “Q.M.” MChJga qarashli AGTKSh tomonidan tabiiy gaz tarmog‘iga gaz hisoblagich uskunasini aylanib o‘tish orqali ulangani natijasida davlat va jamiyat manfaatlariga 448,4 million so‘m zarar yetkazilgani aniqlangan.
Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Energetika vazirligi qariyb 17 ming xonadonning 1 kunlik iste’moliga teng gazdan noqonuniy foydalanilganini aniqlagandi.
Izoh (0)