Тошкент шаҳри Бектемир туманида вояга етмаган болалар автомобилни олиб қочди. Бу ҳақда Тергов департаменти хабар қилди.
Қайд этилишича, 7 февраль куни соат 06:43 да Бектемир тумани бўйича ИИО ФМБ Навбатчилик қисмига хабар келиб тушган. Унга кўра, номаълум шахс Сувсоз даҳаси «Роҳат» маҳалласи 47-уй олдидаги автотураргоҳда Т.Р. (65 ёшли)га тегишли Nexia-1 автомашинасини қаровсиз, эшиклари қулфланмаган ва калити ўт олдиргичда қолганидан фойдаланиб, номаълум томонга олиб қочган.
Олиб борилган тезкор-қидирув тадбирлар натижасида жиноятни вояга етмаган Ш.Р. (12 ёшли) ва Ф.Д. (16 ёшли) содир этгани аниқланган. Автомашина Бектемир тумани Оҳангарон шоҳкўчаси Чирчиқ дарёси устидаги автомашиналар ўтиш учун мўлжалланган кўприк устида қолдириб кетилган.
Аниқланишича, болалар кўприк устида автомашинанинг ёнилғиси тугаб қолгани сабаб яширинмоқчи бўлган вақтида хизмат вазифасини бажариб келаётган патруль-пост хизмати ходимлари томонидан ушланган.
Ҳолат юзасидан Жиноят кодексининг 267-моддаси (транспорт воситасини олиб қочиш) билан жиноят иши қўзғатилган. Ҳозирда тергов ҳаракатлари давом этмоқда.
Изоҳ (0)