Мексиканинг Энсенада шаҳрида яшовчилар 6 февраль куни осмонда кўринган номаълум жисмни тасвирга олди. Улар буни метеорит деб ўйлашган, аммо объект аслида 2017 йилда EchoStar23 геостационар алоқа сунъий йўлдоши билан коинотга учирилган SpaceX Falcon 9 ракетасининг иккинчи бўлаги экани маълум бўлди. Ҳозирда у атмосферада бутунлай парчаланиб кетган.
SpaceX компанияси сўнгги марта 3 февраль куни 49 та Starlink интернет сунъий йўлдошларини орбитага чиқарди. Кейинроқ компаниянинг хабар беришича, геомагнит бўрони туфайли 49 та сунъий йўлдошдан тахминан 40 таси йўқолган.
Қайд этилишича, қуйи баландликларда қаршиликнинг кучайиши натижасида 40 га яқин сунъий йўлдош орбитадан чиқиб кетган ва Ер атмосферасига қайтган. Бўрон туфайли ҳаво қаршилиги аввалгига қараганда 50 фоизга ортган. Мутахассислар қаршиликни камайтириш учун мини-сунъий йўлдошларни хавфсиз режимга ўтказишга қарор қилган, бунда улар орбитада ён томонга ҳаракатланади, аммо ушбу чоралар ёрдам бермаган.
Компания маълумотларига кўра, орбитадан чиқиб кетган аппаратлар бошқа сунъий йўлдошлар учун хавф туғдирмайди, улар Ер атмосферасига кирганда ёниб кетишга мўлжалланган.
SpaceX орбитал гуруҳи ҳар бирининг оғирлиги 290 кг бўлган икки мингдан ортиқ космик аппаратдан иборат. Ҳозирда компания дунёдаги энг йирик сунъий йўлдош оператори ҳисобланади.
Келажакда SpaceX Ер аҳолисини дунёнинг исталган нуқтасида интернет билан таъминлайдиган тўлиқ миқёсли тармоқни яратиш учун ушбу турдаги 12 000 та космик аппаратни (кейинчалик 30 000 та) орбитал гуруҳга жойлаштиришни режалаштирмоқда. Лойиҳага тикилган сармоянинг умумий ҳажми 10 миллиард долларга баҳоланмоқда.
Изоҳ (0)