Yerevan Lukashenkoning Armaniston Rossiya—Belarus ittifoqiga qo‘shilishi haqida aytgan gaplariga munosabat bildirdi

Belarus prezidenti Aleksandr Lukashenko teleboshlovchi Vladimir Solovyovga bergan intervyusida Sobiq Ittifoqi respublikalarining aksariyati, jumladan, Armaniston ham Belarus va Rossiya ittifoq davlatiga qo‘shilishi mumkinligini aytgandi. Yerevan Lukashenkoning bayonotiga munosabat bildirdi.

“Belarus prezidentining tor doiradagi geosiyosiy tahlili, birinchi navbatda, o‘zining ichki siyosiy kun tartibiga xizmat qilishiga aminmiz, buni Armaniston va uning tashqi siyosatiga hech qanday dahli yo‘q”, — dedi Armaniston tashqi ishlar vaziri Vagan Unanyan.

Intervyusida Lukashenko Ukraina va Qozog‘iston 15 yil ichida Rossiya va Belarus ittifoq davlatiga qo‘shilishi haqida fikr bildirgan. “Armaniston ham qayerga boradi? Ular kimgadir kerak deb o‘ylaysizmi?”, — deya qo‘shimcha qilgan u. Lukashenkoning so‘zlariga ko‘ra, O‘zbekiston, Turkmaniston va Tojikiston ham “iqtisodiy zarurat” tufayli yangi uyushmaga qo‘shiladi.

Keyinroq O‘zbekiston jamoatchiligi Lukashenkoning gaplariga munosabat bildirdi.

“Bugun ko‘plab rivojlangan davlatlar Lukashenkoni Belarus xalqi nomidan gapira olmaydigan shaxs deb hisoblaydi. Shuning uchun, bugungi kunda bu insonning O‘zbekiston haqidagi fantaziyalarini jiddiy qabul qilish shart emas”, — deya ta’kidlaydi “Yuksalish” umummilliy harakati raisi Bobur Bekmurodov.

Ittifoq davlati — bu Rossiya va Belarusning integratsiya loyihasi bo‘lib, Moskva va Minsk 1990-yillarning oxirida uni takomillashtirishni boshlagan. Loyiha parlament, valyuta va qonunchilikni umumlashtirishni nazarda tutadi. 20 yildan ortiq davom etgan hamkorlik tarixida tomonlar shu paytgacha faqat soliq va bojxona qonunchiligini sinxronlashtirishga yaqinlashgan. Belarus rahbari Aleksandr Lukashenkoning aytishicha, ittifoq integratsiya bosqichlari uchun muddat belgilamaydi.