Italiyada ko‘chalarda majburiy niqob taqish rejimi bekor qilinadi

Italiyada 11-fevraldan boshlab ko‘chalarda niqob taqib yurish majburiyati bekor qilinadi, deb xabar beradi The Local.

Ma’lum qilinishicha, bunga qadar barcha jamoat joylarida — xoh u ochiq bo‘lsin, xoh yopiq — niqobda yurish kerak bo‘lgan. Bu kabi qoida koronavirusning omikron shtammi tarqalishni boshlagan vaqtda, 2021-yilning dekabrida joriy etilgan.

Endilikda 11-fevraldan boshlab himoya niqoblaridan odamlar ommaviy to‘planadigan va yopiq jamoat joylarida foydalaniladi. Yangi qoidalar kamida 31-martga qadar amalda bo‘ladi.

Avvaliga ko‘chada niqobda yurish tartibini faqatgina kasallanish xavfi past darajada bo‘lgan viloyatlarda bekor qilish rejalashtirilgan edi, ammo u butun mamlakat bo‘ylab joriy etilgan. Ta’kidlanishicha, bu Italiya hukumatining koronavirus cheklovlarini yumshatish borasidagi birinchi qadamidir.

Italiya aholisining 80 foizi koronavirusga qarshi to‘liq emlangan. So‘nggi haftada yangi kasallanish holati va shifoxonaga yotqizilayotganlar soni sekin-asta kamaymoqda, biroq qurbonlar soni doimiy ravishda yuqoriligicha qolyapti: sutkasiga o‘rtacha 300—450 kishi.

1-fevraldan Italiyada 50 yoshdan kattalar uchun koronavirusga qarshi emlanish majburiy etib belgilandi. Sog‘lig‘i tufayli vaksinatsiyadan ozod etilgan insonlardan tashqari emlanmagan barcha fuqarolar 100 yevro miqdorida jarimaga tortiladi.

Avvalroq Buyuk Britaniya va Norvegiya koronavirusga qarshi emlanganlar chegarani kesib o‘tgandan so‘ng joylashtiriladigan karantin tartibini bekor qilgandi. Shuningdek, Avstriya Yevroittifoq mamlakatlaridan birinchi bo‘lib majburiy vaksinatsiyani joriy etgan.