Andijon viloyatida 2021-yilda ayollar tomonidan sodir etilgan jinoyatlar 477 tadan 830 taga ortib, umumiy jinoyatlarning 12 foizini tashkil etgan, deya xabar bermoqda “Daryo” muxbiri.
Ma’lum qilinishicha, jinoyatga qo‘l urgan ayollar soni esa 488 tadan 868 taga oshib, jami jinoyat sodir etgan shaxslarning 14 foizini tashkil etgan.
Tahlillarga ko‘ra, jinoyatlarning 308 tasi oiladagi ijtimoiy-iqtisodiy vaziyat yuzasidan kelishmovchilik, ishsizlik, 310 tasi huquqiy bilim va savodxonlikning pastligi, o‘zgalarni aldoviga ishonib qolish, 212 tasi yengil-yelpi hayotga berilish, oson pul topish hamda g‘ayriijtimoiy holatlar, ya’ni alkogolizm, giyohvandlik, fohishalik kabi salbiy odatlarga ruju qo‘yish oqibatida sodir etilgan.
2021-yil davomida 18 ming 768 nafar xotin-qiz tomonidan huquqbuzarliklar sodir etilgan bo‘lib, 2020-yilga taqqoslaganda 3694 taga ko‘paygan. Ularning asosiy qismini haqorat (7789 ta), tan jarohati yetkazish (2772 ta), tuhmat (724 ta) kabi huquqbuzarliklar tashkil etgan. Bundan tashqari, xotin qizlarning 12 nafari giyohvandlikka, 140 nafari spirtli ichimlik ichishga ruju qo‘ygani aniqlangan.
Jinoyat va huquqbuzarlik sodir etgan 985 nafar xotin-qizlarning 297 nafari 18—30 yoshgacha bo‘lgan ayollar ekani aniqlangan.
Eslatib o‘tamiz, Andijon viloyatida 2021-yilning noyabr oyida yoshlar o‘rtasida sodir etilgan jinoyatlar soni 2020-yilga nisbatan 565 taga ko‘paygan.
Izoh (0)