Qoraqalpog‘istonning Nukus shahrida 8-fevral kuni soat 03:07 da tez yordamga Goneqal’a hududida ko‘chaga tashlab ketilgan chaqaloqqa shoshilinch yordam ko‘rsatish bo‘yicha chaqiruv kelib tushgan. Bu haqda “Gazeta.uz” xabar qildi.
Qayd etilishicha, tez yordam xizmatchilari 7 daqiqa ichida voqea joyiga yetib borib, hali kindigi ham kesilmagan chaqaloqqa birinchi yordam ko‘rsatgan. Shundan so‘ng chaqaloq hududiy perinatal markazga yetkazilgan.
Chaqaloq perinatal markazning reanimatsiya bo‘limiga qabul qilinib, shifokorlarning to‘liq nazoratiga olingan. Go‘dakning og‘irligi 3 kg 700 gramm bo‘lib, hozirda uning ahvoli og‘ir, lekin barqaror.
Aniqlanishicha, 8-fevral kuni soat 02:00 larda Taxtako‘pir tumanida hisobda turgan Nukus shahri Bo‘ston ko‘chasida vaqtincha yashovchi A.K. (2002-yilda tug‘ilgan) o‘g‘il bolani dunyoga keltirib, o‘zi yashaydigan uy yaqinidagi hududga tashlab ketgan. Shundan so‘ng chaqaloq Respublika perinatal markaziga yotqizilib, hayoti saqlab qolingan.
Bosh prokuraturaning ma’lum qilishicha, holat bo‘yicha Jinoyat kodeksining 117-moddasi 1-qismi (farzandini xavf ostida qoldirish) bilan jinoyat ishi ochilib, dastlabki tergov harakatlari olib borilmoqda.
Izoh (0)