Андижон вилоятида 2021 йилда аёллар томонидан содир этилган жиноятлар 477 тадан 830 тага ортиб, умумий жиноятларнинг 12 фоизини ташкил этган, дея хабар бермоқда «Дарё» мухбири.
Маълум қилинишича, жиноятга қўл урган аёллар сони эса 488 тадан 868 тага ошиб, жами жиноят содир этган шахсларнинг 14 фоизини ташкил этган.
Таҳлилларга кўра, жиноятларнинг 308 таси оиладаги ижтимоий-иқтисодий вазият юзасидан келишмовчилик, ишсизлик, 310 таси ҳуқуқий билим ва саводхонликнинг пастлиги, ўзгаларни алдовига ишониб қолиш, 212 таси енгил-елпи ҳаётга берилиш, осон пул топиш ҳамда ғайриижтимоий ҳолатлар, яъни алкоголизм, гиёҳвандлик, фоҳишалик каби салбий одатларга ружу қўйиш оқибатида содир этилган.
2021 йил давомида 18 минг 768 нафар хотин-қиз томонидан ҳуқуқбузарликлар содир этилган бўлиб, 2020 йилга таққослаганда 3694 тага кўпайган. Уларнинг асосий қисмини ҳақорат (7789 та), тан жароҳати етказиш (2772 та), туҳмат (724 та) каби ҳуқуқбузарликлар ташкил этган. Бундан ташқари, хотин қизларнинг 12 нафари гиёҳвандликка, 140 нафари спиртли ичимлик ичишга ружу қўйгани аниқланган.
Жиноят ва ҳуқуқбузарлик содир этган 985 нафар хотин-қизларнинг 297 нафари 18—30 ёшгача бўлган аёллар экани аниқланган.
Эслатиб ўтамиз, Андижон вилоятида 2021 йилнинг ноябрь ойида ёшлар ўртасида содир этилган жиноятлар сони 2020 йилга нисбатан 565 тага кўпайган.
Изоҳ (0)