Prezident Shavkat Mirziyoyev huzurida hududlarda ichimlik suvi ta’minotini yaxshilash masalalari yuzasidan yig‘ilish bo‘lib o‘tdi. Unda viloyat hokimlari “O‘zsuvta’minot” bilan birga 2022-yilning o‘zida markazlashgan ichimlik suvi ta’minotini 75 foizga yetkazishi shartligi ko‘rsatib o‘tildi.
“Har bir viloyat o‘zini rejalarini o‘n kunda qayta ko‘rib chiqib, ularni oshirish bo‘yicha taklifni berishi zarur”, – dedi prezident.
Bu ishlarni jadallashtirish uchun suv ta’minoti loyihalari bo‘yicha joylardagi “O‘zsuvta’minot”ning injiniring kompaniyalari viloyat hokimliklari tasarrufiga o‘tkaziladi. Loyiha-smeta hujjatlarini ishlab chiqish, pudratchilarni aniqlash va moliyalashtirishni ochish viloyatning o‘zida bo‘ladi.
Uy-joy kommunal xizmat ko‘rsatish vazirligi va “O‘zsuvta’minot” loyihalarga texnik talablarni belgilaydi va ularni ekspertizadan o‘tkazadi, ishlarni qabul qilib, ekspluatatsiyaga mas’ul va javobgar bo‘ladi.
Shu bilan birga, mutasaddilarga ushbu yangi tizimni amaliyotga joriy qilish topshirildi.
Yig‘ilishda bugungi kunda mavjud 8 mingta suv qudug‘idan 1,5 mingtasi yaroqsiz holatga kelgan bo‘lib, qariyb 800 ta mahallada suv ta’minoti yomonlashgani ta’kidlandi.
Shu bilan birga, Zomin, Nurota va Qo‘shrabot konlarida yerosti quduqlarini qazish hamda Zarafshon, Chirchiq kabi daryolar o‘zanida qum-shag‘al olish ishlarini nazoratsiz, pala-partish amalga oshirish oqibatida ushbu hududlarda yerosti chuchuk suvlari zaxiralari 30 metrgacha pasaygan.
Yig‘ilishda bundan buyon suv quduqlarini aniqlash va burg‘ilash ishlari faqat Geologiya qo‘mitasi tomonidan amalga oshirilishi belgilandi.
Ikki oy muddatda Zarafshon va Chirchiq daryolarining ichimlik suvi ta’minotiga salbiy ta’sir ko‘rsatadigan uchastkalarida tartib o‘rnatish topshirildi.
“Boshqa daryo bo‘ylaridagi ahvol ham qattiq nazoratga olinishi kerak. U yerlardagi holatdan to‘liq xabarim bor. Bunga ham ikki oy muhlat beraman”, – dedi davlat rahbari.
Izoh (0)