Toshkentda ota uch nafar voyaga yetmagan farzandi uchun aliment o‘rniga uy sovg‘a qildi

Toshkent shahri Mirobod tumanida ota farzandlarining aliment puli o‘rniga Qo‘yliq mavzesidan uy rasmiylashtirdi. Bu haqda Majburiy ijro byurosi “Daryo”ga ma’lum qildi.

Qayd etilishicha, Majburiy ijro byurosining Mirobod tuman bo‘limiga tegishli sud qaroriga ko‘ra, qarzdor K.N.dan undiruvchi G.N. foydasiga voyaga yetmagan uch nafar farzandining ta’minoti uchun ish haqi va boshqa daromadlarining yarim qismi miqdorida aliment undirish haqidagi ish kelib tushgan. Unga muvofiq ijro ishi yuritish qo‘zg‘atilgan.

Ijro harakatlari jarayonida qarzdor K.N. tomonidan aliment pullarini o‘rniga Qo‘yliq mavzesidagi o‘ziga tegishli xonadonni undiruvchi G.N.ga notariusning oldi-sotdi shartnomasiga asosan o‘tkazib berilgan.

Ijro hujjati G.N.ning roziligiga binoan tamomlangan.