Kansler Olaf Shols Germaniya Ukrainaga halokatli qurollarni yetkazib berish niyatida emasligini aytdi. Bu haqda u AQShga uchib ketishidan oldin ARD telekanaliga bergan intervyusida ma’lum qilgan, deb yozadi “TASS”.
“Germaniya hukumati anchadan buyon aniq yo‘nalishga ega: inqirozli hududlarga va Ukrainaga halokatli qurollarni yetkazib bermaymiz. Bu kabi siyosatga mendan oldingi kansler ham (Angela Merkel) sodiq edi va bu to‘g‘ri hamda shunday qoladi”, — deydi Shols.
Shuningdek, u nemis xalqi manfaatlariga mos keladigan ishni qilish va mazkur holatda mamlakat fuqarolarining nuqtayi nazarini ifodalashi o‘zining burchi ekanini qayd etgan.
Kansler Boltiq bo‘yi mamlakatlarida Germaniya harbiylarining kuchaytirilishi mumkinmi degan savolga javob bermagan. U 10-fevral kuni Berlinda Litva prezidenti Gitanas Nauseda, Estoniya va Latviya bosh vazirlari Kaya Kallas va Karinsh Krishyanis bilan uchrashishini eslatib o‘tgan. “Men uchun biz do‘stlar sifatida birgalikda bo‘lishimiz va harakatlarimizni muvofiqlashtirishimiz hamda buni ommaviy axborot vositalari orqali qilmaganimiz juda muhim”, — deydi Shols.
Hukumat rahbarining hisoblashicha, hozirda chinakam “inqirozli davr” boshlangan. “Mening Yevropada urushga yo‘l qo‘ymaslik bo‘yicha fuqarolar oldida majburiyatim bor”, — deya ta’kidlagan u.
Nashrning yozishicha, Berlin Kiyevga qurol yetkazib berishga qarshi. Shu bilan birga, mamlakat Yevropa Ittifoqidagi sheriklari, ayniqsa, Polsha va Boltiq bo‘yi mamlakatlari, shuningdek, AQSh tomonidan bosimga uchramoqda. Ukrainaning ayrim vakillari Germaniyani hatto “do‘stlarini sotishda” ayblagan. 4-fevral kuni Süddeutsche Zeitung Ukrainaning Berlindagi elchixonasi Germaniya TIVga Kiyev olishni istayotgan qurollar ro‘yxati keltirilgan nota yuborganini ma’lum qildi.
Avvalroq The New York Times manbalariga tayanib, Rossiya Ukraina hududiga bostirib kirishga hali tayyor emasligi, ammo harbiy operatsiyaga tayyorgarlikning yakuniy bosqichida ekani haqida xabar bergandi.
Bir necha oydan buyon G‘arb siyosatchilari va ommaviy axborot vositalari Rossiya Ukraina bilan chegarasi yaqinida harbiy kuchlar to‘playotgani haqida xabar bermoqda, ularning fikricha, bu bosqinga tayyorgarlik bo‘lishi mumkin. Agar Ukrainaga hujum bo‘lsa, G‘arb davlatlari Rossiyaga qarshi sanksiyalar qo‘llamoqchi.
Rossiya hukumati Ukrainaga hujum qilmoqchi emasligini aytib, chegara yaqinida harbiy qismlarning joylashtirilishini oddiy mashg‘ulotlar bilan izohlamoqda.
Izoh (0)