Prezident Aleksandr Lukashenko teleboshlovchi Vladimir Solovyovga bergan intervyusida Ukraina “Donbassga qarshi urush boshlasa”, Belarus armiyasi xuddi Rossiya armiyasi kabi harakat qilishini ma’lum qildi. Mazkur suhbat parchasi Solovyovning Telegram kanalida e’lon qilingan.
“Agarda ular (Ukraina — tahr.) bizga yoki Rossiyaga qarshi urush boshlasa, u holda biz ham o‘zimini himoya qilish maqsadida jangga kiramiz”, — deydi Lukashenko. Donbassga qarshi harbiy harakatlar sodir bo‘lsa, Belarus armiyasi qanday yo‘l tutishi to‘g‘risidagi savolga Belarus prezidenti “Rossiya armiyasidek”, — deya javob qaytargan.
Lukashenko, shuningdek, bu qo‘shma harakatlar bo‘lishini tasdiqlagan. “Biz janubiy chegaralarimizda hazil qilyapmizmi?”, — deydi u. Solovyovning Rossiya va Belarus ayni vaqtda kimga qarshi o‘quv mashg‘ulotlarini o‘tkazyapti degan savoliga Lukashenko “kerak bo‘lsa Ukraina va NATOga qarshi”, — deya aniqlik kiritgan.
Avvalroq Rossiya—Belarus harbiylari o‘rtasidagi qo‘shma o‘quv mashg‘ulotlar 2022-yilning fevralida o‘tkazilishi to‘g‘risida xabar berilgandi. Belarus prezidenti Aleksandr Lukashenko 17-yanvar kuni Minskda o‘tkazilgan yig‘ilishda qo‘shma o‘quv mashg‘ulotlari fevralda boshlanishini ma’lum qilgan. Shuningdek, uning so‘zlariga ko‘ra, Boltiqbo‘yi davlatlari va Polshaning o‘n minglab harbiy xizmatchilari e’tibori Belarus chegarasiga qaratilgan. Yanvar o‘rtalaridan boshlab Rossiya Qurolli Kuchlarining “Ittifoqchilik jasorati” qo‘shma o‘quv mashg‘ulotlarida ishtirok etadigan bo‘linmalari Belarusga kelishni boshlagan.
Conflict Intelligence Team tergov guruhi rossiyalik desantchilar Ukraina chegarasi yaqiniga tashlanayotganini ma’lum qilgandi. Tergov guruhining Rossiya temiryo‘llari ma’lumotlar bazasiga tayanib ma’lum qilishicha, poyezd Ivanov viloyatidagi “Tekstilniy” stansiyasidan harakatlangan. Ta’kidlanishicha, uning yonida 98-havo-desant diviziyasining 217-gvardiya parashyut-desant polka joylashgan.
Izoh (0)