Германиялик муҳандислар Зиген шаҳри яқинидан ўтган А45 федерал автомагистралидаги Ринсдорф кўпригини портлатиш йўли билан қулатиб, мамлакатда янги рекорд ўрнатди. Бу ҳақда Deutsche Welle хабар берди.
Нашр маълумотларига кўра, соҳа мутахассислари Германиянинг Шимолий Рейн-Вестфалия штатидаги А45 автобаниясидаги йўл ўтказгични йўқ қилиш учун 120 килограммга яқин портловчи моддадан фойдаланган. Кўприкнинг баландлиги 70 метр, кенглиги эса 500 метр эди. Мазкур портлатиш Германияда янги рекорд ўрнатди, чунки мамлакатда ҳали бундай баландликдаги кўприклар портлатилмаган.
55 йиллик иншоотнинг қулашини томоша қилиш учун ўнлаб одамлар йиғилди. Бузиш бўйича мутахассис Майкл Шнайдер портлаш ҳақида сигнал берганидан сўнг кўприкнинг 16 та устуни қоқ ўртасидан букилиб, йўл қопламаси ерга қулаган.
Кўприкни қулатиш шундай ташкил этилганки, вайроналар олдиндан тайёрлаб қўйилган пойдеворга тушади ва нарироқдаги янги кўприкка зарар етказмайди. Янги кўприк 2021 йил декабрь ойида очилган эди.
Келгуси икки ой давомида бу ердаги вайроналар тозаланади, сўнгра ушбу тезюрар йўлнинг қатнов қисмини кенгайтириш лойиҳаси доирасида янги йўл ўтказгич қурилиши бошланади.
Германиянинг аҳоли энг зич жойлашган Шимолий Рейн-Вестфалия штатида 60 га яқин йўл ўтказгичлар алмаштириш ёки шошилинч таъмирлашга муҳтожлиги айтилмоқда, улардан 15 таси эса қурилиш босқичида.
Изоҳ (0)