Adliya vaziri Ruslanbek Davletov 7-fevral kuni o‘tkazilgan an’anaviy yillik hisoboti davomida davlat xizmatchilarining safarlariga va xorijlik mehmonlarni kutib olishga sarflanadigan davlat budjeti xarajatlari to‘g‘risida fikr bildirdi.
Adliya vazirining so‘zlariga ko‘ra, OAVlar “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi prezident farmoniga e’tibor qilmayapti. Uning aytishicha, farmon bilan 33 ta yo‘nalishdagi hujjatlarni ochiqlash belgilangan va talab qilingan. Xususan, hujjat bilan mehnat safarlariga borgandagi, chet eldan kelayotgan mehmonlarga qilinayotgan xarajatlarni ochiqlash belgilangan.
“Bilamiz, o‘zbeklar juda mehmondo‘st xalq. Lekin mehmondo‘stlik budjetning hisobiga bo‘lmasligi kerak. Xarajatlar budjetdan bo‘lsa, oddiyroq ‘rels’larga o‘tishimiz kerak. Chunki katta xarajatlar — hammasi xalqning puli”, — deydi u.
Avvalroq Ruslanbek Davletov TikTok platformasini bloklash bo‘yicha bildirilgan takliflar haqida gapirib, u axborotning erkin tarqalishi tarafdori ekanini ta’kidlagandi.
Izoh (0)