Адлия вазири Русланбек Давлетов 7 февраль куни ўтказилган анъанавий йиллик ҳисоботи давомида давлат хизматчиларининг сафарларига ва хорижлик меҳмонларни кутиб олишга сарфланадиган давлат бюджети харажатлари тўғрисида фикр билдирди.
Адлия вазирининг сўзларига кўра, ОАВлар «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги президент фармонига эътибор қилмаяпти. Унинг айтишича, фармон билан 33 та йўналишдаги ҳужжатларни очиқлаш белгиланган ва талаб қилинган. Хусусан, ҳужжат билан меҳнат сафарларига боргандаги, чет элдан келаётган меҳмонларга қилинаётган харажатларни очиқлаш белгиланган.
«Биламиз, ўзбеклар жуда меҳмондўст халқ. Лекин меҳмондўстлик бюджетнинг ҳисобига бўлмаслиги керак. Харажатлар бюджетдан бўлса, оддийроқ ‘рельс’ларга ўтишимиз керак. Чунки катта харажатлар — ҳаммаси халқнинг пули», — дейди у.
Аввалроқ Русланбек Давлетов TikTok платформасини блоклаш бўйича билдирилган таклифлар ҳақида гапириб, у ахборотнинг эркин тарқалиши тарафдори эканини таъкидлаганди.
Изоҳ (0)