Adliya vaziri Ruslanbek Davletov TikTok platformasini bloklash bo‘yicha bildirilgan takliflar haqida gapirib, u axborotning erkin tarqalishi tarafdori ekanini ta’kidladi. Bu haqda vazir jamoatchilikka bergan an’anaviy yillik hisoboti davomida aytib o‘tdi, deb xabar beradi “Daryo” muxbiri.
“Men axborotning erkin tarqalishi tarafdoriman. Tarixda ham axborotni cheklash ko‘p bo‘lgan. Bloklash nima degani o‘zi. Texnik nuqtayi nazarda buning imkoni bormi? Blokladik, deylik, hamma VPN’ga o‘tadi-ku. Bilasizmi, har kuni qancha yangi dasturlar chiqadi. Biz jaholatga qarshi ma’rifat bilan kurashimiz kerak. TikTok’dan boshqa yomon kontent yo‘qmi? Bloklash texnik jihatdan qiyin masala. O‘ylaymanki, bu hech qanday samara bermaydi” — deydi adliya vaziri Ruslanbek Davletov.
Eslatib o‘tamiz, 2021-yil iyul oyida O‘zbekistonda TikTok va Twitter’ning ochilishi sekinlashdi. 2-iyul kuni esa O‘zbekistonda ayrim ijtimoiy tarmoqlar, xususan, TikTok’dan foydalanish rasman cheklandi.
Keyinchalik “Milliy tiklanish” demokratik partiyasi Markaziy kengashi raisi o‘rinbosari Feruza Muhammadjonova TikTok ijtimoiy tarmog‘ini butunlay bloklashni taklif qildi.
Toshkent shahar hokimi “Toshkent yoshlar forumi — 2020” doirasida bo‘lib o‘tgan matbuot anjumanida “tiktokerlarga taqiq qo‘yish emas, ularni to‘g‘ri yo‘lga yo‘naltirish bo‘yicha ish olib borishimiz kerakligi” haqida aytgan edi.
“TikTok bir platforma, u yerda turli kontent bor. Hamma o‘ziga kerakli kontent oladi. Ming afsuski, taqiq qo‘yilgan odamlar kerakmas kontentlarga kirgani ko‘rinib turibdi. Agar kerakli kontentlarga kirilsa, hech qanday platformaning zarari yo‘q, deb o‘ylayman. Mening fikrimcha, tag‘in bilmadim”, — degan edi hokim “Toshkent yoshlar forumi – 2021” doirasida bo‘lib o‘tgan matbuot anjumanida.
2022-yilning fevral boshlarida esa “Adolat” sotsial-demokratik partiyasi faollari O‘zbekistonda TikTok ijtimoiy tarmog‘ini butunlay bloklash taklifini ilgari surdi.
Izoh (0)