Diniy tashkilotlarning ayrim vakillari kimlargadir hukm o‘qishi huquqiy nuqtayi nazardan noto‘g‘ri. Bu haqda adliya vaziri Ruslanbek Davletov jamoatchilikka bergan an’anaviy yillik hisoboti davomida aytib o‘tdi, deb xabar beradi “Daryo” muxbiri.
“Diniy tashkilotlarning ayrim vakillari chiqib, ‘U ishni qilsa, bunday bo‘lar ekan, bu ishni qilsa, bunday bo‘ladi. Uni uyiga kirmang. Bu narsani ichsa, bunday bo‘ladi, ma’lum bir viloyatliklar bunday’, degan gapiga huquq nuqtayi nazaridan biz chidab turolmaymiz. Chunki bu, birinchidan, jamiyatimizning bo‘linishiga olib kelyapti, ikkinchidan, diniy tashkilotlarning bunday ixtilof qilishga haqqi yo‘q. Bilasizlarmi nimaga? Asosiy sabab mana shu aytilayotgan insonlar kimlargadir hukm o‘qiyapti. Hamma odamlarga tamg‘a bosish huquqi yo‘q”, — deydi adliya vaziri.
Davletov fuqarolar dinga xohlasa ishonishi, xohlamasa, ishonmasligini yoki umuman tarki dunyo qilib yashashi mumkinligini eslatib, bu ularning konstitutsiyaviy huquqi ekanini ta’kidlagan. Shuningdek, vazir diniy tashkilotlarga va barcha shu sohadagi domlalarga “signal” bermoqchi ekanini ma’lum qilgan.
“Bir ‘signal’ni diniy tashkilotlarga va barcha shu sohadagi domlalarimizga yetkazib qo‘ymoqchimizki, biz Adliya vazirligi sifatida bu faoliyatni nazorat qilamiz. Biz bu borada juda faol ishlaymiz. Chunki hech qachon bu masalalarni bir normaga keltirib bo‘lmaydi. Hammaning o‘z fikri bo‘ladi, bu esa bo‘linishga olib kelaveradi. Shuning uchun ham qonunda hamma o‘zi hal qiladi, degan. Bekorga aytilmagan vijdon erkinligi, deb. Vijdonining oldida o‘zi javob beradi. Bo‘lmasa, axloq politsiyasi qilaylik, ko‘chaga chiqib yubkalarning uzun-kaltaligini o‘lchaylik. Buning oxiri bo‘lmaydi. Hammada yondashuv har xil. Men bu gaplarni huquqiy nuqtayi nazardan aytyapman. Mening axloqiy normalar to‘g‘risida gapirishga haqqim yo‘q. Gapirsam ham, o‘zimning fuqaro sifatidagi fikrimni ayta olaman”, — deydi vazir.
Avvalroq Toshkent viloyati Zangiota tumani “Fath” jome masjidida imom noibi vazifasida ishlab kelgan Solixon Ortiqxo‘jayev ishdan bo‘shatilgani to‘g‘risida xabar berilgandi. Solixon domla ijtimoiy tarmoqlarda diniy soha vakili maqomiga zid chiqishlari uchun bir necha bor O‘zbekiston musulmonlari idorasi rahbariyati tomonidan ogohlantirilib, unga tegishli ko‘rsatma va tavsiyalar berilgan. Solixon domla 2021-yilda o‘zining chiqishlarida amaldagi qonun talablarini buzgani uchun ma’muriy javobgarlikka tortilgan. Ammo Solixon domla yuqorida qayd etilgan ogohlantirishlardan to‘g‘ri xulosa chiqarmagan.
Izoh (0)