So‘nggi kunlarda mamlakat yo‘llarida sodir bo‘lgan baxtsiz hodisalar tafsilotlarini taqdim etamiz.
Toshkentda 4 ta avtomobil ishtirokida to‘qnashuv sodir bo‘ldi
Holat Toshkent shahar Olmazor tumani Qorasaroy ko‘chasida 6-fevral kuni soat 13:00 lar atrofida yuz bergan. YTHda haydovchilar:- J.O. (1993-yilda tug‘ilgan) boshqaruvidagi Mercedes-Benz yuk avtomobili;
- R.G. (1966-yilda tug‘ilgan) boshqaruvidagi Lacetti;
- A.U. (1989-yilda tug‘ilgan) boshqaruvidagi Cobalt;
- A.M. (1998-yilda tug‘ilgan) boshqaruvida bo‘lgan Hyundai Sonata avtomobillari ishtirokida to‘qnashuv sodir bo‘lgan.
Oqibatda Lacetti avtomobilida bo‘lgan ikki nafar yo‘lovchiga birinchi tez tibbiy yordam ko‘rsatilgan.
Hozirda ushbu YTH yuzasidan YHXB xodimlari tomonidan surishtiruv olib borilmoqda.
Namanganda voyaga yetmagan bola Lacetti’da beton ustunga borib urilishi oqibatida vafot etdi
Ma’lum qilinishicha, yo‘l-transport hodisasi 6-fevral kuni soat 12:30 larda Namangan shahar Boburshoh ko‘chasida joylashgan Atlas MChJ binosi oldida sodir bo‘lgan. Voyaga yetmagan shaxs (2005-yilda tug‘ilgan) tegishli hujjatlarsiz Lacetti avtomobilini boshqarib ketayotib, boshqaruvni yo‘qotgan va yo‘l chetidagi beton stolbaga urilgan.
Oqibatda haydovchi og‘ir tan jarohati olib, voqea joyida vafot etgan. Avtomashinadagi yo‘lovchi (2005-yilda tug‘ilgan) esa bosh miya yopiq shikasti tashxisi bilan shifoxonaga yotqizilgan.
Mazkur holat bo‘yicha shahar IIO FMB huzuridagi TB tomonidan tergovga qadar tekshiruv harakatlari olib borilmoqda.
Farg‘ona viloyati soliq boshqarmasi bosh inspektori avtohalokatda halok bo‘ldi
Qayd etilishicha, 4-fevral kuni Farg‘ona viloyati davlat soliq boshqarmasi bosh inspektori M.X. o‘ziga tegishli Lacetti avtomashinasida baxtsiz hodisaga uchragan.
Haydovchi Respublika shoshilinch tibbiyot ilmiy markazi Farg‘ona filialiga yotqizilgan. Ko‘rsatilgan tibbiy muolajalarga qaramay, xodim vafot etgan.
Jizzaxda yuk mashinasi yonib ketdi
Jizzax viloyati Favqulodda vaziyatlar boshqarmasiga 6-fevral kuni 12:28 da M39 Olmaota—Toshkent—Termiz xalqaro avtomobil yo‘lining Sh.Rashidov tumani hududidan o‘tgan 977-kilometrida yuk mashinasi yonib ketgani to‘g‘risida ma’lumot kelib tushgan.
Yong‘in-qutqaruv bo‘linmalar aytilgan joyga yuborilgan. Dastlabki bo‘linmalar aytilgan manzilga soat 18:45 da yetib borgan. Yuk avtomobilida ko‘p miqdorda yengil alangalanuvchi va yonuvchi mahsulotlar (lak-bo‘yoq) bo‘lgani sababli yong‘inni o‘chirishga qo‘shimcha kuch va vositalar jalb etilgan.
Ayni vaqtda yong‘in to‘liq bartaraf etilib, yong‘indan keyingi ishlar bajarilmoqda.
Hodisa oqibatida hech kim jabrlanmagan. Hozirda yong‘in sababi va ko‘rilgan moddiy zarar miqdori aniqlanmoqda.
Samarqandda haydovchi uxlab qolishi oqibatida yuk mashinasi ag‘anadi
Yo‘l-transport hodisasi 6-fevral kuni soat 10:10 atrofida Samarqand viloyati Kattaqo‘rg‘on tumani hududidan o‘tuvchi M-37 avtomobil yo‘lining 84-kilometrida sodir bo‘lgan. Toshkent—Samarqand yo‘nalishida harakatlanib kelayotgan yuk mashinasining haydovchisi uxlab qolishi oqibatida rul boshqaruvini yo‘qotib, mashina beton to‘siqqa urilgan va ag‘anagan.
Hodisada avtotransport vositasi va ichidagi yuklariga shikast yetgan. Haydovchiga tibbiyot birlashmasida tez tibbiy yordam ko‘rsatilgan. Hozirda uning ahvoli yaxshi.
Mavzuga doir:
Izoh (0)