O‘zbekistondagi tibbiyot muassasalarida ortiqcha qog‘ozbozlikka chek qo‘yilib, yangi tartibda ish yuritish boshlanishi xabar qilingandi. Shunga ko‘ra, 1-fevraldan boshlab birlamchi tibbiy-sanitariya muassasalarida yuritiladigan 26 turdagi hisob jurnallaridan 14 tasi qoldirilib, 10 tasi soddalashtiriladi, deb xabar bermoqda Sog‘liqni saqlash vazirligi.
Qayd etilishicha, endilikda amaliyotda quyidagi tibbiy hisob jurnallari yuritiladi:
- shifokorning kundalik qabul jurnali;
- akusher-ginekologning kundalik qabul jurnali;
- shifokorlik maslahat komissiyasi xulosalarini qayd etish jurnali;
- mehnatga layoqatsizlik varag‘ini qayd etish jurnali;
- muolaja xonasida qon namunalari olishni qayd etish jurnali;
- fizioterapiya hamshirasining kundalik qabul jurnali;
- asbob-uskunalarni zararsizlantirishga topshirish va qabul qilish jurnali;
- oila hamshirasining kundalik faoliyat jurnali;
- dori vositalari, diagnostikum, reaktiv va tibbiy buyumlarni miqdoriy hisobga olish jurnali;
- muolajalarni qayd qilish jurnali;
- yuqumli kasalliklarni qayd etish jurnali;
- emlashni qayd etish jurnali;
- oila pasporti (028-h/sh);
- laborator tahlillarni qayd etish jurnali (034-h/sh).
Eslatib o‘tamiz, 2021-yilning noyabr oxirlarida Sog‘liqni saqlash vazirligida Toshkent shahridagi bir guruh tibbiyot xodimlari bilan o‘tkazilgan uchrashuvda amaliyot uchun foydali bo‘lmagan, ortiqcha ovoragarchiliklarni keltirib chiqarayotgan hujjat va hisobot shakllarini qayta ko‘rib chiqish hamda qisqartirish yuzasidan mutasaddilarga topshiriqlar berilgandi.
Izoh (0)