Сўнгги кунларда мамлакат йўлларида содир бўлган бахтсиз ҳодисалар тафсилотларини тақдим этамиз.
Тошкентда 4 та автомобиль иштирокида тўқнашув содир бўлди
Ҳолат Тошкент шаҳар Олмазор тумани Қорасарой кўчасида 6 февраль куни соат 13:00 лар атрофида юз берган. ЙТҲда ҳайдовчилар:- Ж.О. (1993 йилда туғилган) бошқарувидаги Mercedes-Benz юк автомобили;
- Р.Г. (1966 йилда туғилган) бошқарувидаги Lacetti;
- А.У. (1989 йилда туғилган) бошқарувидаги Cobalt;
- А.М. (1998 йилда туғилган) бошқарувида бўлган Hyundai Sonata автомобиллари иштирокида тўқнашув содир бўлган.
Оқибатда Lacetti автомобилида бўлган икки нафар йўловчига биринчи тез тиббий ёрдам кўрсатилган.
Ҳозирда ушбу ЙТҲ юзасидан ЙҲХБ ходимлари томонидан суриштирув олиб борилмоқда.
Наманганда вояга етмаган бола Lacetti’да бетон устунга бориб урилиши оқибатида вафот этди
Маълум қилинишича, йўл-транспорт ҳодисаси 6 февраль куни соат 12:30 ларда Наманган шаҳар Бобуршоҳ кўчасида жойлашган Атлас МЧЖ биноси олдида содир бўлган. Вояга етмаган шахс (2005 йилда туғилган) тегишли ҳужжатларсиз Lacetti автомобилини бошқариб кетаётиб, бошқарувни йўқотган ва йўл четидаги бетон столбага урилган.
Оқибатда ҳайдовчи оғир тан жароҳати олиб, воқеа жойида вафот этган. Автомашинадаги йўловчи (2005 йилда туғилган) эса бош мия ёпиқ шикасти ташхиси билан шифохонага ётқизилган.
Мазкур ҳолат бўйича шаҳар ИИО ФМБ ҳузуридаги ТБ томонидан терговга қадар текширув ҳаракатлари олиб борилмоқда.
Фарғона вилояти солиқ бошқармаси бош инспектори автоҳалокатда ҳалок бўлди
Қайд этилишича, 4 февраль куни Фарғона вилояти давлат солиқ бошқармаси бош инспектори М.Х. ўзига тегишли Lacetti автомашинасида бахтсиз ҳодисага учраган.
Ҳайдовчи Республика шошилинч тиббиёт илмий маркази Фарғона филиалига ётқизилган. Кўрсатилган тиббий муолажаларга қарамай, ходим вафот этган.
Жиззахда юк машинаси ёниб кетди
Жиззах вилояти Фавқулодда вазиятлар бошқармасига 6 февраль куни 12:28 да М39 Олмаота—Тошкент—Термиз халқаро автомобиль йўлининг Ш.Рашидов тумани ҳудудидан ўтган 977-километрида юк машинаси ёниб кетгани тўғрисида маълумот келиб тушган.
Ёнғин-қутқарув бўлинмалар айтилган жойга юборилган. Дастлабки бўлинмалар айтилган манзилга соат 18:45 да етиб борган. Юк автомобилида кўп миқдорда енгил алангаланувчи ва ёнувчи маҳсулотлар (лак-бўёқ) бўлгани сабабли ёнғинни ўчиришга қўшимча куч ва воситалар жалб этилган.
Айни вақтда ёнғин тўлиқ бартараф этилиб, ёнғиндан кейинги ишлар бажарилмоқда.
Ҳодиса оқибатида ҳеч ким жабрланмаган. Ҳозирда ёнғин сабаби ва кўрилган моддий зарар миқдори аниқланмоқда.
Самарқандда ҳайдовчи ухлаб қолиши оқибатида юк машинаси ағанади
Йўл-транспорт ҳодисаси 6 февраль куни соат 10:10 атрофида Самарқанд вилояти Каттақўрғон тумани ҳудудидан ўтувчи М-37 автомобиль йўлининг 84-километрида содир бўлган. Тошкент—Самарқанд йўналишида ҳаракатланиб келаётган юк машинасининг ҳайдовчиси ухлаб қолиши оқибатида рул бошқарувини йўқотиб, машина бетон тўсиққа урилган ва ағанаган.
Ҳодисада автотранспорт воситаси ва ичидаги юкларига шикаст етган. Ҳайдовчига тиббиёт бирлашмасида тез тиббий ёрдам кўрсатилган. Ҳозирда унинг аҳволи яхши.
Изоҳ (0)