Qamchiq dovonida mashinasi bilan qolib ketgan 14 kishi evakuatsiya qilindi

Qamchiq dovonida qolib ketgan transport vositalari va fuqarolarga amaliy yordam ko‘rsatildi, deb xabar bermoqda Favqulodda vaziyatlar vazirligi.

Ma’lum qilinishicha, 6-fevral kuni soat 19:05 da “Qamchiq” Maxsus qidiruv, yong‘in-qutqaruv boshqarmasi navbatchi-dispetcheriga Qamchiq dovonidan o‘tgan A-373 Toshkent—O‘sh avtomobil yo‘lining 242-kilometrida shimoliy aylanma yo‘lida ob-havoning keskin o‘zgarishi natijasida tepalikda qolib ketgan 14 nafar fuqaroga yordam kerakligi haqida ma’lumot kelib tushgan.

Voqea joyiga zudlik bilan “Qamchiq” Qutqaruv otryadidan maxsus texnika hamda qutqaruvchi xodimlar chiqib, tog‘da qolib ketgan 14 nafar fuqaro hamda ularning transport vositalarini pastga olib tushish hamda evakuatsiya qilish ishlari amalga oshirilgan.

Qutqaruvchilar soat 20:10 da barcha fuqarolarni sog‘-omon pastga olib tushib, manzillariga yuborishda amaliy yordam ko‘rsatgan. Hodisa natijasida hech kim tan jarohati olmagan.

Eslatib o‘tamiz, FVV 6—7-fevral kunlari Qamchiq dovoniga qor yog‘ishi mumkinligi sabab haydovchilarni ogohlantirgandi.

“Qamchiqavtoyo‘l” matbuot xizmati xabariga ko‘ra, A-373 M-39 Guliston—Bo‘ka—Angren—Qo‘qon—Andijon orqali-O‘sh avtomobil yo‘lining Qamchiq dovonidan o‘tgan qismi 171-263 kilometrlar oralig‘ida qor yog‘ishi davom etmoqda. Dovonda transport vositalarining beto‘xtov ikki tomonlama harakatlanishi ta’minlash uchun yo‘llarni qordan tozalash ishlari olib borilmoqda.

Samarqand viloyatining Urgut tumanidan o‘tgan M-39 avtomobil yo‘lining Taxtaqorcha dovonida ham 6-fevral kuni qalin qor yog‘di. Dastlab qisqa muddatga — soat 11:00 dan 11:53 gacha yopilgan yo‘l soat 17:30 dan boshlab avtomobillar harakati uchun yana yopildi.