Samarqand viloyatining Urgut tumanidan o‘tgan M-39 avtomobil yo‘lining Taxtaqorcha dovoni 6-fevral kuni soat 17:30 dan avtomobillar harakati uchun vaqtincha yopildi. Bu haqda viloyat Favqulodda vaziyatlar boshqarmasi xabar qildi.
Qayd etilishicha, bunga yo‘lning dovon qismida tinimsiz yoqqan qor oqibatida yo‘lning yuza qismida muzlamalar xosil bo‘lgani sabab bo‘lgan.
“Ayni daqiqalarda viloyat FVB rahbarligida tegishli tashkilotlarning mutaxassislari tomonidan vaziyat oqibatlarini bartaraf etish borasida keng ko‘lamli ishlar amalga oshirilmoqda. Hozirda Taxtaqorcha dovonini qayta ochilishi kutilmoqda”, — deyiladi xabarda.
Eslatib o‘tamiz, “O‘zgidromet” 6-fevral, yakshanba kuni tog‘oldi va tog‘li hududlarda ba’zi joylarda yog‘ingarchilik kuchli bo‘lishi mumkinligini, tog‘li avtomobil yo‘llarda qor uyumlari va ko‘rinish yomonlashishi kutilayotganini ma’lum qilgandi. Shu kuni Samarqand va Qashqadaryo viloyatlarini bog‘lovchi Taxtaqoracha dovonida kuchli qor yog‘di. Qalin qor tufayli soat 11:00 dan Qashqadaryo viloyatining Kitob tumanidan o‘tgan M-39 avtomobil yo‘lining Taxtaqoracha dovoni avtomobillar harakati uchun vaqtincha yopildi. Qisqa muddatga yopilgan yo‘l 6-fevral kuni soat 11:53 da qayta ochildi.
Izoh (0)