Davron Hidoyatov 781 gektar yer maydoni prezident farmoniga xilof tarzda ajratib bergani haqidagi xabarlar yuzasidan munosabat bildirildi

Ijtimoiy tarmoqlarda Chirchiq shahar hokimi lavozimida ishlayotgan Davron Hidoyatov Toshkent viloyati hokimi bo‘lib ishlagan davrida mas’uliyati cheklangan jamiyatlardan biriga 781 gektar yer maydoni prezident farmoniga xilof tarzda ajratilgani oid xabarlar tarqaldi. Toshkent viloyati hokimligi matbuot xizmati “Daryo”ga tarqalgan xabarlar yuzasidan munosabat taqdim etdi.

Qayd etilishicha, 2021-yilning 27-avgust kuni O‘zbekiston Respublikasi Oliy Majlisi Senatining o‘n sakkizinchi yalpi majlisida Toshkent viloyatidan 7 853,3 gektar yer maydoni, shundan 3250,013 gektar qishloq xo‘jaligiga mo‘ljallangan yer maydoni Toshkent shahriga o‘tkazilgan. Bu, o‘z navbatida, aholiga oziq-ovqat mahsulotlari yetkazib berish va oziq-ovqat xavfsizligini ta’minlashga muayyan darajada salbiy ta’sir ko‘rsatmay qolmagan.

Shu jihatni inobatga olgan holda, oziq-ovqat xavfsizligini ta’minlash siyosatini yanada mustahkamlash va Toshkent viloyatining qishloq xo‘jaligi samaradorligi salohiyatini barqaror saqlash maqsadida, Toshkent viloyati hokimining 2021-yil 7-oktyabr kuni 164-10-0-Q/21-sonli “Viloyat hokimining 2021-yil 16-sentyabrdagi 128-10-0-Q/21-sonli qaroriga o‘zgartirish va qo‘shimchalar kiritish to‘g‘risida”gi qarori qabul qilingan.

Shuningdek, kodeksning 61-moddasida yuridik shaxslar o‘zlariga biriktirib qo‘yilgan yerlardan tuman yoki shahar hokimining qaroriga muvofiq boshqa yuridik shaxslarga, fuqarolarga yer uchastkalarini vaqtincha foydalanishga berishlari mumkinligini nazarda tutuvchi normalar mavjud.

Bundan tashqari, O‘zbekiston Respublikasi Oliy Majlis Senatining 2017-yil 24-avgustdagi “Toshkent viloyatining To‘ytepa shahri va O‘rta Chirchiq tumanining chegaralarini o‘zgartirish, To‘ytepa shahrini viloyat bo‘ysunuvidagi shaharlar turkumiga kiritish hamda To‘ytepa shahrini Toshkent viloyatining ma’muriy markazi etib belgilash, shuningdek, Toshkent viloyatining Angren shahri hududini qisman o‘zgartirish to‘g‘risida”gi SQ-207-III-son qarori bilan sobiq To‘ytepa shahri hududi 3248,2 gektar etib belgilangan hamda shahar hududiga o‘tayotgan qishloq xo‘jaligiga mo‘ljallangan yerlar toifasi o‘zgartirilgan.

Qolaversa, Vazirlar Mahkamasining 2018-yil 25-iyundagi “2035-yil davrigacha Nurafshon shahrining bosh rejasini tasdiqlash to‘g‘risida”gi 473-son qarori bilan Nurafshon shahrining 2035-yil davrigacha bo‘lgan bosh rejasi asosiy qoidalari tasdiqlangan bo‘lib, unga ko‘ra 3248,2 gektar yer maydoni istiqbolda shahar infratuzilmasini rivojlantirish uchun ajratilganligi ko‘rsatilgan.

Yer kodeksining 43-moddasida Qishloq xo‘jaligi ehtiyojlari uchun berib qo‘yilgan yoki ana shu maqsadlar uchun belgilangan yerlar qishloq xo‘jaligiga mo‘ljallangan yerlar hisoblanishi belgilangan.

O‘zbekiston Respublikasi Prezidentining 2021-yil 28-iyuldagi PQ-5200-son qaroriga asosan, Toshkent viloyatida jami 11 013 gektar yer maydoniga tokzor plantatsiyalari barpo etilishi belgilangan. Qishloq xo‘jaligi foydalanishidagi yer maydonlarida 2022-yil boshoqli don ekinini joylashtirish bo‘yicha Toshkent viloyatida belgilangan ko‘rsatkichlarni ta’minlash maqsadida boshoqli don ekinlarini ekish maqsadga muvofiq, deb topilgan.

“Shu o‘rinda, qishloq xo‘jaligiga mo‘ljallangan yerlarni berish (tasarruf etish, ijara, foydalanishga berish, vaqtinchalik biriktirish va hokazo) yuzasidan ma’muriy reglament ishlab chiqilmagani, hududiy adliya organlari tomonidan qaror loyihasini huquqiy ekspertizadan o‘tkazilish mexanizmi yaratilmaganini ham nazarda tutish lozim.

Qaror sanasiga e’tibor qilinsa, (oktabr oyi) u ayni qishloq xo‘jaligi ekinlari, xususan, kuzgi g‘alla ekish mavsumi ketayotgan pallada qabul qilinganini ko‘rish mumkin. Bundan anglashiladiki, ekish mavsumi o‘tib ketsa, yil yakuniga kelib, yer maydonlari ekin ekish uchun yaroqsiz holatga kelib qolishi, bu esa, o‘z navbatida, yuqorida ta’kidlanganidek, aholini oziq-ovqat mahsulotlari bilan ta’minlashda muammolar tug‘dirishi hisobga olingan va yer mavsumiy foydalanish uchun tezkor biriktirib berilgan.

Bir so‘z bilan aytganda, o‘sha vaqtda yerdan samarali foydalanish, dehqonlar ta’biriga ko‘ra, yerning “umri”ni bekor o‘tkazmaslik, qolaversa, Toshkent viloyatida Hukumat tomonidan berilgan topshiriqlarni to‘laqonli bajarish, viloyat ko‘rsatkichlarini Respublika ko‘rsatkichlari darajasiga yetkazish uchun mana shunday yo‘l tutilgan va yuqoridagi qaror qabul qilingan”, – deyiladi hokimlik xabarida.

Adliya vazirligi munosabati

O‘zbekiston Respublikasi Oliy Majlisi Senatining yigirma uchinchi yalpi majlisida adliya vaziri Ruslan Davletovning 2021-yilda davlat organlari va tashkilotlarining norma ijodkorligi faoliyati va huquqni qo‘llash amaliyotining holati to‘g‘risidagi axboroti eshitildi.

Vazir o‘z axborotida yana bir muhim masala – yer ajratish borasida ham ma’lumotlarni taqdim etdi.

Ta’kidlanishicha, O‘zbekistonda yer ajratish allaqachon auksion orqali amalga oshirish tizimiga o‘tilgan bo‘lsa-da, baribir to‘g‘ridan to‘g‘ri yer ajratishga urinishlar uchrab turibdi. Bu masala bo‘yicha tushuntirishlar berildi, yer ajratishga oid ko‘pchilik narsalar, xususan, registratsiya kitoblarini yuritish mahalliy davlat hokimiyati organlaridan olib qo‘yilgan.

Shunga qaramay Toshkent viloyatida 2021-yil oktabr oyida 781 gektar yer maydoni MChJga shundoq berib yuborilgani haqida ma’lumot berildi.

“Adliya vaziri tomonidan yuqoridagi Toshkent viloyatida bo‘lgan yer ajratish bo‘yicha holatlar biror subyekt yoki shaxs tomonidan sodir etilganligi yoxud sodir etgan shaxslarni javobgarlikka tortish masalasi bo‘yicha hech qanday ma’lumot berilmagan.

Faqatgina bu kabi holatlarning oldini olish kerakligi, yer ajratishda yanada e’tiborli bo‘lish lozimligi va bu sohadagi islohotlarni davom ettirish joizligi haqida aytib o‘tilgan”, – deyiladi vazirlik xabarida.

Eslatib o‘tamiz, 18-noyabr kuni Toshkent viloyati hokimi Davron Hidoyatov lavozimidan ozod etilib, Chirchiq shahri hokimi etib tayinlandi. Hidoyatovning o‘rniga Qashqadaryo viloyatiga 2019-yilning oktabridan buyon rahbarlik qilib kelayotgan Zoir Mirzayev tayinlandi.