Jizzax viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari O‘zbekistonga olib kirilgan televizorlarning qonunga xilof realizatsiyasini oldini olish va fosh etish yuzasidan tezkor tadbir o‘tkazdi. Bu haqda Davlat bojxona qo‘mitasi matbuot xizmati xabar berdi.
Tadbir davomida fuqaro D.J. boshqaruvidagi Toshkent—Xorazm yo‘nalishida harakatlanib ketayotgan Isuzu rusumli yuk transport vositasi viloyatning Do‘stlik tumani hududida to‘xtatilib, belgilangan tartibda ko‘zdan kechirilgan.
Tekshiruv natijasida avtoulov yukxonasida bojxona rasmiylashtiruvidan o‘tganini tasdiqlovchi hech qanday hujjatlari bo‘lmagan, tegishli qonun talablariga ko‘ra markirovkalanmagan, umumiy qiymati 316 million so‘mlik jami 76 dona televizor borligi aniqlangan.
Shuningdek, Farg‘ona viloyati bojxona boshqarmasining tezkor xodimlari hamda viloyat Davlat xavfsizlik xizmati vakillari hamkorligida katta miqdordagi televizorlarning mamlakatga aylanma yo‘llar orqali olib kirilishining oldi olingan.
O‘tkazilgan tezkor tadbirda Log‘on—Farg‘ona yo‘nalishida harakatlanayotgan fuqaro M.A. boshqaruvidagi Cobalt rusumli avtomashina kuzatuvga olinib, Farg‘ona shahrida joylashgan fuqaro G.D.ning yashash xonadoniga kirgan vaqtida xolislar ishtirokida ko‘zdan kechirilgan. Natijada avtomashina saloni va yukxonasida xorijda ishlab chiqarilgan, tegishli hujjatlari bo‘lmagan, 2 turdagi jami 27 dona televizor borligi aniqlangan. Shundan so‘ng tadbir ishtirokchilari tomonidan mazkur xonadon ham ko‘zdan kechirilganida, u yerda ham hujjatlari bo‘lmagan 5 turdagi 43 dona televizor saqlanayotgani ma’lum bo‘lgan.
Bundan tashqari, Vodil—Oltiariq yo‘nalishida harakatlanayotgan fuqaro M.N. boshqaruvidagi Cobalt rusumli avtotransport vositasi Farg‘ona tumani hududida to‘xtatilib ko‘zdan kechirilganida, mazkur avtomashina saloni va yukxonasida ham xorijda ishlab chiqarilgan, bojxona rasmiylashtiruvidan o‘tganini tasdiqlovchi hujjatlari bo‘lmagan, qiymati 41,3 million so‘mlik 2 turdagi, jami 15 dona televizor borligi aniqlangan.
Farg‘ona viloyati Milliy gvardiya xodimlari bilan hamkorlikda Farg‘ona tumanida o‘tkazilgan tezkor tadbir davomida esa fuqaro E.Z. va I.X.ga tegishli bo‘lgan xonadonlar belgilangan tartibda ko‘zdan kechirilgan. Ko‘zdan kechirish jarayonida hech qanday hujjatlarsiz, umumiy qiymati 47,7 million so‘mlik jami 34 dona televizor saqlanayotgani oshkor bo‘lgan.
Umumiy hisobda, Farg‘ona viloyati bojxona boshqarmasi tezkor xodimlari tomonidan o‘tkazilgan tezkor tadbirlar davomida dastlabki qiymati 232,3 million so‘mlik, jami 119 dona televizorning noqonuniy olib kirilishi va saqlanishiga chek qo‘yilgan.
Hozirda ushbu holatlar yuzasidan bojxona organlari tomonidan surishtiruv harakatlari davom ettirilmoqda.
Avvalroq Farg‘onada 405 million so‘mlik televizorlarning noqonuniy aylanmasiga chek qo‘yilgani to‘g‘risida xabar berilgandi.
Izoh (0)