Qashqadaryo viloyatida faoliyat yurituvchi prokuror-hokimlar “O‘zbekiston prokuraturasiga 30 yil” esdalik nishoni bilan taqdirlandi. Bu haqda “Daryo”ga hokimliklar axborot xizmati rahbarlari xabar berdi.
Qayd etilishicha, viloyatdagi G‘uzor, Mirishkor hamda Shahrisabz tumani hokimlari mazkur esdalik nishonga munosib ko‘rilgan.
“2006—2007-yillarda aynan Mirishkor tumanida tuman prokuraturasi tergovchisi sifatida ish boshlaganman. Bugungi e’tirof menga aynan o‘sha kunlarni eslatdi. Garchi bugun hokim sifatida faoliyatimizni davo ettirayotgan bo‘lsak-da, tizimda ishlagan xodim sifatida e’tirof etishgani meni judayam quvontirdi”, — deydi prokurorlikdan hokimlikka o‘tgan Mirishkor tumani hokimi Sherali Sanayev.
Sherali Sanayevning matbuot kotibi Azizbek Yazdurdiyevning qo‘shimcha qilishicha, u 2013—2018-yillarda Mirishkor tumani prokurori sifatida faoliyat yuritgan.
G‘uzor tumani hokimligi axborot xizmati rahbari Xudoyberdi Yo‘ldoshevning ma’lum qilishicha, 2018-yilning avgust oyidan 2020-yilning aprel oyiga qadar G‘uzor tumani prokurori, 2020-yildan beri tuman hokimi sifatida ishlab kelayotgan Bekzod Suyunov ham “O‘zbekiston prokuraturasiga 30 yil” esdalik nishoniga munosib ko‘rilgan.
Shuningdek, prokuratura tizimida 17 yil faoliyat yuritgan, ayni kundagi Shahrisabz tumani hokimi Samad Hasanovga ham “O‘zbekiston prokuraturasiga 30 yil” esdalik nishoni topshirilgan.
Qashqadaryoda prokuratura tizimidan chiqqan to‘rt nafar hokim faoliyat yuritadi. Aynan viloyat hokimi Murodjon Azimov ham prokuratura tizimida ishlagan.
Izoh (0)