Ижтимоий тармоқларда Чирчиқ шаҳар ҳокими лавозимида ишлаётган Даврон Ҳидоятов Тошкент вилояти ҳокими бўлиб ишлаган даврида масъулияти чекланган жамиятлардан бирига 781 гектар ер майдони президент фармонига хилоф тарзда ажратилгани оид хабарлар тарқалди. Тошкент вилояти ҳокимлиги матбуот хизмати «Дарё»га тарқалган хабарлар юзасидан муносабат тақдим этди.
Қайд этилишича, 2021 йилнинг 27 август куни Ўзбекистон Республикаси Олий Мажлиси Сенатининг ўн саккизинчи ялпи мажлисида Тошкент вилоятидан 7 853,3 гектар ер майдони, шундан 3250,013 гектар қишлоқ хўжалигига мўлжалланган ер майдони Тошкент шаҳрига ўтказилган. Бу, ўз навбатида, аҳолига озиқ-овқат маҳсулотлари етказиб бериш ва озиқ-овқат хавфсизлигини таъминлашга муайян даражада салбий таъсир кўрсатмай қолмаган.
Шу жиҳатни инобатга олган ҳолда, озиқ-овқат хавфсизлигини таъминлаш сиёсатини янада мустаҳкамлаш ва Тошкент вилоятининг қишлоқ хўжалиги самарадорлиги салоҳиятини барқарор сақлаш мақсадида, Тошкент вилояти ҳокимининг 2021 йил 7-октябр куни 164-10-0-Қ/21-сонли «Вилоят ҳокимининг 2021 йил 16-сентябрдаги 128-10-0-Қ/21-сонли қарорига ўзгартириш ва қўшимчалар киритиш тўғрисида»ги қарори қабул қилинган.
Унга кўра, МЧЖга Нурафшон шаҳри ҳудудидаги жами 781 гектар ер майдони шаҳарнинг тасдиқланган бош режасига асосан қурилиш ишлари бошлангунга қадар бошоқли дон экинларини экиш учун вақтинча бириктириб берилган. (Маълумот ўрнида, 2021 йилнинг ўзида Нурафшон шаҳри учун ажратилган ерлардан 50 гектар ер майдонлари йўллар ва бошқа инфратузилмани ташкил қилиш учун фойдаланилган.)
Шунингдек, кодекснинг 61-моддасида юридик шахслар ўзларига бириктириб қўйилган ерлардан туман ёки шаҳар ҳокимининг қарорига мувофиқ бошқа юридик шахсларга, фуқароларга ер участкаларини вақтинча фойдаланишга беришлари мумкинлигини назарда тутувчи нормалар мавжуд.
Бундан ташқари, Ўзбекистон Республикаси Олий Мажлис Сенатининг 2017 йил 24 августдаги «Тошкент вилоятининг Тўйтепа шаҳри ва Ўрта Чирчиқ туманининг чегараларини ўзгартириш, Тўйтепа шаҳрини вилоят бўйсунувидаги шаҳарлар туркумига киритиш ҳамда Тўйтепа шаҳрини Тошкент вилоятининг маъмурий маркази этиб белгилаш, шунингдек, Тошкент вилоятининг Ангрен шаҳри ҳудудини қисман ўзгартириш тўғрисида»ги СҚ-207-III-сон қарори билан собиқ Тўйтепа шаҳри ҳудуди 3248,2 гектар этиб белгиланган ҳамда шаҳар ҳудудига ўтаётган қишлоқ хўжалигига мўлжалланган ерлар тоифаси ўзгартирилган.
Қолаверса, Вазирлар Маҳкамасининг 2018 йил 25 июндаги «2035 йил давригача Нурафшон шаҳрининг бош режасини тасдиқлаш тўғрисида»ги 473-сон қарори билан Нурафшон шаҳрининг 2035 йил давригача бўлган бош режаси асосий қоидалари тасдиқланган бўлиб, унга кўра 3248,2 гектар ер майдони истиқболда шаҳар инфратузилмасини ривожлантириш учун ажратилганлиги кўрсатилган.
Ер кодексининг 43-моддасида Қишлоқ хўжалиги эҳтиёжлари учун бериб қўйилган ёки ана шу мақсадлар учун белгиланган ерлар қишлоқ хўжалигига мўлжалланган ерлар ҳисобланиши белгиланган.
Ўзбекистон Республикаси Президентининг 2021 йил 28 июлдаги ПҚ-5200-сон қарорига асосан, Тошкент вилоятида жами 11 013 гектар ер майдонига токзор плантациялари барпо этилиши белгиланган. Қишлоқ хўжалиги фойдаланишидаги ер майдонларида 2022 йил бошоқли дон экинини жойлаштириш бўйича Тошкент вилоятида белгиланган кўрсаткичларни таъминлаш мақсадида бошоқли дон экинларини экиш мақсадга мувофиқ, деб топилган.
«Шу ўринда, қишлоқ хўжалигига мўлжалланган ерларни бериш (тасарруф этиш, ижара, фойдаланишга бериш, вақтинчалик бириктириш ва ҳоказо) юзасидан маъмурий регламент ишлаб чиқилмагани, ҳудудий адлия органлари томонидан қарор лойиҳасини ҳуқуқий экспертизадан ўтказилиш механизми яратилмаганини ҳам назарда тутиш лозим.
Қарор санасига эътибор қилинса, (октябрь ойи) у айни қишлоқ хўжалиги экинлари, хусусан, кузги ғалла экиш мавсуми кетаётган паллада қабул қилинганини кўриш мумкин. Бундан англашиладики, экиш мавсуми ўтиб кетса, йил якунига келиб, ер майдонлари экин экиш учун яроқсиз ҳолатга келиб қолиши, бу эса, ўз навбатида, юқорида таъкидланганидек, аҳолини озиқ-овқат маҳсулотлари билан таъминлашда муаммолар туғдириши ҳисобга олинган ва ер мавсумий фойдаланиш учун тезкор бириктириб берилган.
Бир сўз билан айтганда, ўша вақтда ердан самарали фойдаланиш, деҳқонлар таъбирига кўра, ернинг «умри»ни бекор ўтказмаслик, қолаверса, Тошкент вилоятида Ҳукумат томонидан берилган топшириқларни тўлақонли бажариш, вилоят кўрсаткичларини Республика кўрсаткичлари даражасига етказиш учун мана шундай йўл тутилган ва юқоридаги қарор қабул қилинган», – дейилади ҳокимлик хабарида.
Адлия вазирлиги муносабати
Адлия вазирлиги ҳам ушбу хабарлар юзасидан муносабат билдирди.Ўзбекистон Республикаси Олий Мажлиси Сенатининг йигирма учинчи ялпи мажлисида адлия вазири Руслан Давлетовнинг 2021 йилда давлат органлари ва ташкилотларининг норма ижодкорлиги фаолияти ва ҳуқуқни қўллаш амалиётининг ҳолати тўғрисидаги ахбороти эшитилди.
Вазир ўз ахборотида яна бир муҳим масала – ер ажратиш борасида ҳам маълумотларни тақдим этди.
Таъкидланишича, Ўзбекистонда ер ажратиш аллақачон аукцион орқали амалга ошириш тизимига ўтилган бўлса-да, барибир тўғридан-тўғри ер ажратишга уринишлар учраб турибди. Бу масала бўйича тушунтиришлар берилди, ер ажратишга оид кўпчилик нарсалар, хусусан, регистрация китобларини юритиш маҳаллий давлат ҳокимияти органларидан олиб қўйилган.
Шунга қарамай Тошкент вилоятида 2021 йил октябрь ойида 781 гектар ер майдони МЧЖга шундоқ бериб юборилгани ҳақида маълумот берилди.
«Адлия вазири томонидан юқоридаги Тошкент вилоятида бўлган ер ажратиш бўйича ҳолатлар бирор субъект ёки шахс томонидан содир этилганлиги ёхуд содир этган шахсларни жавобгарликка тортиш масаласи бўйича ҳеч қандай маълумот берилмаган.
Фақатгина бу каби ҳолатларнинг олдини олиш кераклиги, ер ажратишда янада эътиборли бўлиш лозимлиги ва бу соҳадаги ислоҳотларни давом эттириш жоизлиги ҳақида айтиб ўтилган», – дейилади вазирлик хабарида.
Эслатиб ўтамиз, 18 ноябрь куни Тошкент вилояти ҳокими Даврон Ҳидоятов лавозимидан озод этилиб, Чирчиқ шаҳри ҳокими этиб тайинланди. Ҳидоятовнинг ўрнига Қашқадарё вилоятига 2019 йилнинг октябридан буён раҳбарлик қилиб келаётган Зоир Мирзаев тайинланди.
Мавзуга доир:
Изоҳ (0)