Buxoro viloyatidagi chegara postlardan hujjatlarda ko‘rsatilmagan salkam 1,5 milliard so‘mlik mahsulotlarni yashirin ravishda olib o‘tishga uringan shaxslar ushlandi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, Turkmaniston hamda O‘zbekiston davlatlarini chegaralab turuvchi “Xo‘jadavlat” temiryo‘l chegara bojxona posti xodimlari qo‘shni mamlakatdan kirib kelgan temiryo‘l vagonlarini belgilangan nazoratdan o‘tkazgan. Bunda vagonlarda olib kelinayotgan yuklar orasida yuk-kuzatuv hujjatlarida ko‘rsatilmagan 1,5 tonna og‘irlikdagi silikon moyi borligi hamda mazkur tovarning umumiy qiymati 1 milliard 143 million so‘mdan iborat ekani aniqlangan.
Matbuot kotibining so‘zlariga ko‘ra, ushbu holat rasmiylashtirilayotgan paytda “Olot” chegara bojxona posti xodimlari tomonidan xorijiy davlatdan kirib kelgan yuk avtomashinalari ham belgilangan tartibda bojxona nazoratidan o‘tkazilgan. Qo‘shni davlatdan kirib kelgan fuqaro Ch.R.ga tegishli yuk avtomashinasi tirkamasidagi poyabzalga sepish uchun foydalaniladigan sprey tovarlari hujjatlarda ko‘rsatilganidan 1,7 tonna ortiqcha ekani aniqlangan. Tovarning aynan hujjatda ko‘rsatilmagan qismining qiymati salkam 217 million so‘mni tashkil etgan.
“Bundan tashqari, ushbu transport vositasida hujjatlarda ko‘rsatilmagan jami 90 million so‘mli 36 ming dona bolalar sumkalari ham borligi aniqlandi. Hozirda yuqoridagi holatlar yuzasidan bojxona organlari tomonidan surishtiruv harakatlari davom ettirilmoqda”, — deydi Javohir Ismoilov.
Izoh (0)