Afg‘onistonning iqlimi issiq bo‘lgan oltita — Lag‘man, Nangahor, Qandahor, Nimroz, Farah va Hilmand viloyatlarida joylashgan davlat universitetlarida o‘quv jarayonlari boshlandi. BBC’ning ma’lum qilishicha, darslarga bir vaqtning o‘zida erkak va ayol talabalar tashrif buyurmoqda.
Afg‘oniston oliy ta’lim vaziri Abdulboqi Haqqoniy 2-fevraldan mamlakatning qator viloyatlaridagi oliy ta’lim muassasalarini qayta ochilishini ma’lum qilgandi. 26-fevralga qadar mamlakatning barcha viloyatlari va poytaxt Kobuldagi qolgan universitetlar ham o‘z faoliyatini boshlashi kerak.
Haqqoniyning so‘zlariga ko‘ra, oliy ta’lim muassasalarining bir necha oy ishlamaganiga Afg‘onistondagi iqtisodiy inqiroz hamda erkak va ayollar uchun alohida sinflarning yo‘qligi sabab bo‘lgan.
BBC’ning yozishicha, Qandahor viloyatida qayta ish boshlagan universitetda qizlar va yigitlar bitta sinfda o‘qimoqda: yigitlar xonaning old qismida, qizlar esa orqa qismida o‘tiryapti. Talabalardan birining so‘zlariga ko‘ra, universitetda alohida sinflarni ochish qiyin, chunki ta’lim muassasasining binosi juda kichkina.
“Kobul, Hirot va Balx viloyatlaridagi yirik oliy ta’lim dargohlari o‘z ishini qayta boshlashiga ‘Tolibon’ hokimiyat tepasiga kelgach, 200 dan ortiq mahalliy o‘qituvchi Afg‘onistonni tark etgani qo‘shimcha muammolarni yuzaga keltirishi mumkin”, — deyiladi xabarda.
Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgandi. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan edi harakat vakili.
Izoh (0)