Amerikaning Bloomberg agentligi 4-fevral kuni o‘zining sayti orqali “Rossiya Ukrainaga bostirib kirdi” sarlavhasini e’lon qilib yubordi, deb xabar beradi “TASS”. Keyinroq agentlik xatosini tan olib, sarlavhani o‘chirib tashlagan.
“Biz ko‘plab ssenariylarga sarlavha tayyorlaymiz va ‘Rossiya Ukrainaga bostirib kirdi’ sarlavhasi mahalliy vaqt bilan soat 16:00 larda saytimiz orqali tasodifan e’lon qilib yuborildi. Biz ushbu xatomizdan chuqur afsusdamiz”, — deyiladi agentlik saytida e’lon qilingan xabarda.
Ta’kidlanishicha, agentlik rahbariyati bu kabi tushunmovchilik nima sababdan yuzaga kelganini aniqlamoqda.
Ukraina bilan chegarada Rossiya qo‘shinlarining to‘plangani haqidagi ma’lumotlar oktabr oyida g‘arb OAVlarida paydo bo‘lishni boshlagan. Noyabr oyi o‘rtalarida Ukraina prezidenti Vladimir Zelenskiy chegarada 100 ming Rossiya qo‘shini borligini ma’lum qilgan. AQSh Davlat kotibi o‘rinbosari Viktoriya Nuland Rossiyaning Ukrainaga “bostirib kirishi” 2022-yil boshida sodir bo‘lishi mumkinligini aytgan.
Moskva bu ma’lumotlarni rad etib, Ukrainadagi harbiy harakatlarga tayyorgarlik haqidagi xabarlarni “quruq, asossiz keskinlik” deb atamoqda. Qolaversa, Rossiya g‘arb davlatlaridan NATOning sharqqa tomon kengaymasligi, Ukraina esa bu tashkilotga qabul qilinmasligi haqida kafolat talab qilgan.
Rossiya prezidentining matbuot kotibi Dmitriy Peskov Amerika rasmiylarining bayonotini izohlar ekan, AQSh Rossiyaning Ukrainaga bostirib kirish rejalari haqida birinchi marta gapirmayotgani, ammo shu paytgacha hech narsa bo‘lmaganini aytdi. “Bu birinchi da’vo emas. Ilgari ham shunga o‘xshash gaplar aytilgandi. Lekin bundan hech narsa chiqmagan”, — deydi Kreml vakili.
Izoh (0)