AQShda pandemiya boshlanganidan buyon koronavirus asoratlari oqibatida vafot etganlar soni 900 ming kishidan oshdi. Bu haqda COVID-19 tarqalishini real vaqt rejimida kuzatib borayotgan Jon Hopkins universiteti ma’lumotlarida keltirilgan.
Ma’lumotlarga ko‘ra, 5-fevral kuni Toshkent vaqti bilan soat 06:20 da AQShda koronavirus oqibatida vafot etganlar soni 901 288 kishini tashkil etmoqda.
Axios nashrining yozishicha, 2021-yilning dekabr o‘rtalarida AQShda COVID-19 qurbonlari soni 800 ming kishini tashkil etgan.
Ta’kidlanishicha, AQSh koronavirusga chalinganlar va virus asoratlari oqibatida vafot etganlar soni bo‘yicha hamon dunyoda yetakchi. Mamlakatda 76,2 milliondan ortiq odamda koronavirus infeksiyasi aniqlangan.
Kasallanishlar soni bo‘yicha ikkinchi o‘rinda Hindiston ketmoqda — mamlakatda 41,9 million odamda COVID-19 tasdiqlangan va hozirga qadar 500 055 kishi vafot etgan.
Braziliya koronavirusga chalinganlar soni bo‘yicha dunyoda uchinchi o‘rinni egallagan bo‘lib, u yerda 26,2 million kishida virus aniqlangan va 630 767 kishi vafot etgan.
Avvalroq Daniya Yevropada birinchi bo'lib COVID-cheklovlarining barchasini bekor qilgani, Rossiyada koronavirus bilan kunlik kasallanishlar soni 150 mingdan oshib ketgani, Fransiyada ko‘chalarda niqob taqish rejimi bekor qilingani to‘g‘risida xabar berilgandi.
Izoh (0)