Афғонистоннинг иқлими иссиқ бўлган олтита — Лағман, Нангаҳор, Қандаҳор, Нимроз, Фараҳ ва Ҳилманд вилоятларида жойлашган давлат университетларида ўқув жараёнлари бошланди. BBC’нинг маълум қилишича, дарсларга бир вақтнинг ўзида эркак ва аёл талабалар ташриф буюрмоқда.
Афғонистон олий таълим вазири Абдулбоқи Ҳаққоний 2 февралдан мамлакатнинг қатор вилоятларидаги олий таълим муассасаларини қайта очилишини маълум қилганди. 26 февралга қадар мамлакатнинг барча вилоятлари ва пойтахт Кобулдаги қолган университетлар ҳам ўз фаолиятини бошлаши керак.
Ҳаққонийнинг сўзларига кўра, олий таълим муассасаларининг бир неча ой ишламаганига Афғонистондаги иқтисодий инқироз ҳамда эркак ва аёллар учун алоҳида синфларнинг йўқлиги сабаб бўлган.
BBC’нинг ёзишича, Қандаҳор вилоятида қайта иш бошлаган университетда қизлар ва йигитлар битта синфда ўқимоқда: йигитлар хонанинг олд қисмида, қизлар эса орқа қисмида ўтиряпти. Талабалардан бирининг сўзларига кўра, университетда алоҳида синфларни очиш қийин, чунки таълим муассасасининг биноси жуда кичкина.
«Кобул, Ҳирот ва Балх вилоятларидаги йирик олий таълим даргоҳлари ўз ишини қайта бошлашига ‘Толибон’ ҳокимият тепасига келгач, 200 дан ортиқ маҳаллий ўқитувчи Афғонистонни тарк этгани қўшимча муаммоларни юзага келтириши мумкин», — дейилади хабарда.
Кейинчалик Мужоҳид Афғонистондаги ишлайдиган аёлларни ўз хавфсизлиги учун уйдан чиқмасликка чақирганди. «Бизнинг хавфсизлик кучларимизга аёллар билан қандай муносабатда бўлиш, улар билан қандай мулоқот қилиш ҳақида ўргатилмаган. Мамлакатда тўлиқ хавфсизлик ўрнатилмагунча аёллардан уйда қолишини сўраймиз », — деган эди ҳаракат вакили.
Изоҳ (0)