Toshkent shahar hokimligi huzuridagi Jamoatchilik kengashi hukumatga Oliy Majlis Qonunchilik palatasi binosi yaqinida Milliy drama teatri qurilishini ekologik ekspertizadan o‘tkazishni so‘rab, murojaat yo‘lladi. Obyekt Toshkent markazidagi quritilgan ko‘l o‘rnida qurilmoqda.
“Ommaviy axborot vositalarida Oliy Majlis qonunchilik palatasi yonida joylashgan Milliy bog‘ hududidagi ko‘lni quritilib, o‘rnida Milliy drama teatri qurilishi borasida xabarlar 2021-yilning noyabr tarqaldi. Toshkent shahar hokimligi huzuridagi Jamoatchilik kengashi Milliy bog‘dagi ko‘l o‘rnida Milliy akademik drama teatri yangi binosini qurish rejasidan o‘z xavotirini bildiradi. Ma’lum bo‘lishicha, loyiha qonunchilikda o‘rnatilgan tartibda ekologik ekspertizadan o‘tkazilmasdan amalga oshirilishi rejalashtirilgan.
Yuqoridagilarga asoslanib, bu masalani ekologik ekspertizasi xulosalarini inobatga olgan holda hal qilinishi maqsadga muvofiq bo‘lar edi”, — deyiladi Vazirlar Mahkamasi va poytaxt hokimligiga yo‘llangan xatda.
Toshkent shahar hokimi Jahongir Ortiqxo‘jayevning “2021-yilgi ijtimoiy-iqtisodiy rivojlanish yakunlari va 2022-yilga rejalar to‘g‘risida” murojaatida poytaxtdagi Milliy bog‘ hududida Ma’naviyat shaharchasi qurilishi ma’lum qilingandi.
Unga ko‘ra, Toshkentda qurilish sohasida 2022-yilda bir qator yirik obyektlarni topshirish rejalashtirilgan. Xususan, Alisher Navoiy nomidagi xalqaro ilmiy-tadqiqot markazi, O‘zbekiston Milliy kutubxonasi, O‘zbek milliy akademik drama teatri va O‘zbekiston davlat san’at muzeyini o‘z ichiga olgan yangi, ulkan majmua – Ma’naviyat shaharchasi shular jumlasidan.
Eslatib o‘tamiz, Alisher Navoiy nomidagi O‘zbekiston Milliy bog‘i 2017-yildan beri katta qurilish maydoniga aylangan. 2020-yilning mayida bog‘ning O‘zbekiston yozuvchilari uyushmasiga tutash qismida Adiblar xiyoboni tashkil etildi, hududdagi Alisher Navoiy haykali ham xiyobonga moslab qayta o‘rnatildi. 2021-yil iyunida esa sobiq Milliy bog‘ o‘rnida salkam to‘rt yil qurilgan Magic City attraksionlar parki ochildi. Bu orada 2021-yilning aprelida Milliy bog‘ning boshqa chekkasida joylashgan va Korxonalarni sog‘lomlashtirish markazi sifatida foydalanish uchun to‘liq ta’mirdan chiqarilgan “Navro‘z” to‘yxonasi kutilmaganda buzila boshlandi.
Izoh (0)