Namangan viloyati hokimining sobiq o‘rinbosari Ikromjon Karimov 75 yoshida vafot etdi. Bu haqda “Daryo” muxbiri Azizbek Abduvaliyev xabar bermoqda.
Ikromjon Karimov 1947-yilda Namangan shahrida tug‘ilgan. Maktabni bitirgach, institutda ta’lim olib, oliy ma’lumotli yo‘lsoz-muhandis bo‘lib yetishgan. Mehnat faoliyatini yo‘l-loyiha bo‘limi boshliqligidan boshlab, Namangan viloyat hokimining qurilish bo‘yicha o‘rinbosari lavozimigacha bo‘lgan bosqichlarni bosib o‘tdi.
Ikromjon Karimov uzoq yillar mobaynida respublika va viloyat yo‘l qurilishi tashkilotlarida rahbarlik vazifalarida ishlagandi. Mamlakatda zamonaviy avtomobil yo‘llari tarmog‘i barpo etilishiga munosib hissa qo‘shdi. Ko‘p yil Namangan viloyat avtomobil yo‘llari qurish va ulardan foydalanish boshqarmasi (hozirgi “Namanganavtoyo‘l”)ga boshchilik qildi.
Keyinchalik Namangan viloyat hokimining qurilish masalalari bo‘yicha o‘rinbosari, Kosonsoy tumani hokimi vazifalarida ham faoliyat olib bordi. U bir muddat O‘zbekiston Respublikasi Oliy Majlisi Senatining a’zosi ham bo‘lgan.
Izoh (0)