Dam olish kuni anomal iliq keskin sovuq bilan almashadi, deb xabar bermoqda “O‘zgidromet”.
Ma’lum qilinishicha, 4-fevral, juma kuni O‘zbekiston hududiga Turkmaniston hududlaridan juda iliq va quruq havo kirib kelishi kutilmoqda. Harorat foni ko‘p yillik qiymatlardan 5-7 darajaga yuqori bo‘ladi. Kunduz kuni havo 12-14 daraja iliqqacha, ba’zi joylarda 16-18 daraja iliqqacha isiydi.
Shanba kuni iliq havo massasining kirib kelishi kuchayadi. Kunduz kungi harorat 14-17 daraja iliqqacha, ba’zi joylarda 20-22 daraja iliqqacha ko‘tariladi, kechasi biroz sovuq saqlanib turadi. Respublika hududining katta qismida yog‘ingarchilik kutilmaydi, faqat respublikaning shimoliy hududlariga Volga bo‘yi hududlaridan nam havo massasi kirib kelishi prognoz qilinmoqda. Qoraqalpog‘istonda va Xorazm viloyatida ba’zi joylarda yomg‘ir yog‘adi.
Yakshanba kuni sovuq havo kirib kelishi mamlakatning barcha hududlarini qamrab oladi, ob-havo keskin yomonlashadi. Resublika bo‘yicha yomg‘ir yog‘adi, shimolda qor aralash bo‘lishi mumkin. Harorat kunduz kuni 4-9 daraja iliqqacha, shimolda 0-5 daraja iliqqacha pasayadi.
4—6-fevralda respublika bo‘yicha ba’zi joylarda shamol kuchayishi kutilmoqda, ayrim joylarda chang to‘zon kuzatiladi, jumladan:
- 4-fevralda Qoraqalpog‘istonda, Xorazm, Navoiy, Toshkent viloyatlarida 18-23 metr/sekundgacha;
- 5—6-fevralda Qoraqalpog‘istonda, Xorazm, Buxoro, Navoiy, Toshkent, Samarqand, Jizzax, Sirdaryo, Qashqadaryo, Surxondaryo viloyatlarida 18-23 metr/sekundgacha, Navoiy, Toshkent, Jizzax viloyatlarining ayrim joylarida esa 25-28 metr/sekundgacha kuchayishi mumkin.
“O‘zgidromet” hafta oxirlarida yog‘ingarchilik (yomg‘ir, qor), shamol tezligi kuchayishi, chang to‘zoni kuzatilishi haqida avval ham ogohlantirgandi. Favqulodda vaziyatlar vazirligi aholini xavfsizlik qoidalariga rioya qilishga chaqirgan.
Izoh (0)