Тошкент шаҳар ҳокимлиги ҳузуридаги Жамоатчилик кенгаши ҳукуматга Олий Мажлис Қонунчилик палатаси биноси яқинида Миллий драма театри қурилишини экологик экспертизадан ўтказишни сўраб, мурожаат йўллади. Объект Тошкент марказидаги қуритилган кўл ўрнида қурилмоқда.
«Оммавий ахборот воситаларида Олий Мажлис қонунчилик палатаси ёнида жойлашган Миллий боғ ҳудудидаги кўлни қуритилиб, ўрнида Миллий драма театри қурилиши борасида хабарлар 2021 йилнинг ноябрь тарқалди. Тошкент шаҳар ҳокимлиги ҳузуридаги Жамоатчилик кенгаши Миллий боғдаги кўл ўрнида Миллий академик драма театри янги биносини қуриш режасидан ўз хавотирини билдиради. Маълум бўлишича, лойиҳа қонунчиликда ўрнатилган тартибда экологик экспертизадан ўтказилмасдан амалга оширилиши режалаштирилган.
Юқоридагиларга асосланиб, бу масалани экологик экспертизаси хулосаларини инобатга олган ҳолда ҳал қилиниши мақсадга мувофиқ бўлар эди», — дейилади Вазирлар Маҳкамаси ва пойтахт ҳокимлигига йўлланган хатда.
Тошкент шаҳар ҳокими Жаҳонгир Ортиқхўжаевнинг «2021 йилги ижтимоий-иқтисодий ривожланиш якунлари ва 2022 йилга режалар тўғрисида» мурожаатида пойтахтдаги Миллий боғ ҳудудида Маънавият шаҳарчаси қурилиши маълум қилинганди.
Унга кўра, Тошкентда қурилиш соҳасида 2022 йилда бир қатор йирик объектларни топшириш режалаштирилган. Хусусан, Алишер Навоий номидаги халқаро илмий-тадқиқот маркази, Ўзбекистон Миллий кутубхонаси, Ўзбек миллий академик драма театри ва Ўзбекистон давлат санъат музейини ўз ичига олган янги, улкан мажмуа – Маънавият шаҳарчаси шулар жумласидан.
Эслатиб ўтамиз, Алишер Навоий номидаги Ўзбекистон Миллий боғи 2017 йилдан бери катта қурилиш майдонига айланган. 2020 йилнинг майида боғнинг Ўзбекистон ёзувчилари уюшмасига туташ қисмида Адиблар хиёбони ташкил этилди, ҳудуддаги Алишер Навоий ҳайкали ҳам хиёбонга мослаб қайта ўрнатилди. 2021 йил июнида эса собиқ Миллий боғ ўрнида салкам тўрт йил қурилган Magic City аттракционлар парки очилди. Бу орада 2021 йилнинг апрелида Миллий боғнинг бошқа чеккасида жойлашган ва Корхоналарни соғломлаштириш маркази сифатида фойдаланиш учун тўлиқ таъмирдан чиқарилган «Наврўз» тўйхонаси кутилмаганда бузила бошланди.
Изоҳ (0)