Toshkent imtihon markazi — bu haydovchilik guvohnomasini olishga nomzodlar nazariy va amaliy test sinovlaridan iborat avtomatlashtirilgan imtihon kompleksi. Bu haqda 3-fevral kuni poytaxtda bo‘lib o‘tgan markaz taqdimotida ma’lum qilindi, deya xabar bermoqda “Daryo” muxbiri.
Markazning afzalliklaridan biri shundaki, fuqarolar bilimini baholashda inson omili ishtirok etmaydi, butun jarayon avtomatlashtirilgan hamda shaffof.
Nazariy imtihonlar uchun 25 daqiqa vaqt ajratilgan. Mazkur imtihonda 20 ta savolning 18 tasiga to‘g‘ri javob berilsa, imtihondan o‘tgan hisoblanadi. Shundan so‘ng transport vositasini boshqarish uchun amaliy imtihonlarga ruxsat beriladi. Nomzod barcha imtihonlardan muvaffaqiyatli o‘ta olsa, unga maxsus sertifikat beriladi. Ushbu sertifikat asosida fuqarolar Yo‘l harakati xavfsizligi inspeksiyasida yoki davlat xizmatlari markazlarida haydovchilik guvohnomasini olishi mumkin.
Avtomatlashtirilgan sxema bo‘yicha amaliy imtihon o‘tkazish uchun “A”, “B”, “C”, “D”, “BE”, “CE” va “DE” toifali avtomobillar mavjud. Nogironligi bo‘lgan shaxslardan amaliy imtihon olish tegishli tibbiy ko‘rsatmalarga mos keladigan transport vositalarida amalga oshiriladi.
Ma’lumot uchun, prezidentning 2020-yil dekabr oyidagi qaroriga ko‘ra, tadbirkorlik subyektlariga ham haydovchilik guvohnomasini olish uchun nazariy va amaliy imtihonlarni o‘tkazish huquqi berilgan. Ushbu masalani tartibga solish bo‘yicha 2021-yil may oyidagi Hukumat qarori ham qabul qilingan.Eslatib o‘tamiz, Shavkat Mirziyoyev 2022-yil 26-yanvar kuni kengaytirilgan videoselektor yig‘ilishida yo‘l harakati xavfsizligi bilan bog‘liq vaziyatni tanqid qilgan edi. Davlar rahbari haydovchilarni tayyorlash hamda imtihon tizimini tubdan qayta ko‘rib chiqish bo‘yicha ham mutasaddilarga bir qator topshiriqlar bergandi.Foto
Izoh (0)