Ижтимоий тармоқларда Тошкент ахборот технологиялари университетида кредит-модуль тизимининг хатоси сабаб якуний имтиҳонлардан кўплаб талабалар йиқилаётгани тўғрисида хабарлар тарқалди. Олий ва ўрта махсус таълим вазирлигининг маълум қилишича, мазкур масалани ўрганиш бўйича масъуллардан иборат тезкор ишчи гуруҳ тузилган.
2 февраль куни ижтимоий тармоқларда ТАТУ масъулларининг хатоси туфайли талабалар бўлиб ўтган якунийлардан университет ҳисобига 300 миллион сўмдан ортиқ пул тўлаши мумкинлиги ҳақидаги эътирозли хабар тарқалди.
Олий ва ўрта махсус таълим вазирлиги матбуот хизматининг маълумотларига кўра, мазкур масалани ўрганиш бўйича масъуллардан иборат тезкор ишчи гуруҳ тузилган.
«Ҳолат ишчи гуруҳ томонидан объектив ва батафсил ўрганилади ҳамда натижаси бўйича маълумот вазирлик расмий манбалари орқали қўшимча эълон қилинади», — дейилади муносабатда.
Эслатиб ўтамиз, 2020 йил апрель ойида «Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида» президент қарори билан Тошкент давлат шарқшунослик институти негизида Тошкент давлат шарқшунослик университети ташкил этилган, ҳужжатда университетда таълим жараёни босқичма-босқич кредит-модуль тизими асосида амалга оширилиши белгиланганди.
Май ойида эса Тошкент темир йўл муҳандислари институти, Тошкент автомобиль йўлларини лойиҳалаш, қуриш ва эксплуатацияси институти ва Тошкент давлат техника университетининг авиакосмик технологиялари факультети негизида Тошкент транспорт университети ташкил этилиши, 2020/2021-ўқув йилидан университетда кредит-модуль таълим тизими жорий қилиниши ҳақида хабар берилган.
Июнь ойида жамоатчилик муҳокамасига қўйилган «Андижон қишлоқ хўжалиги ва агротехнологиялар институти фаолиятини ташкил этиш ҳамда аграр таълим тизимини янада такомиллаштириш чора-тадбирлари тўғрисида»ги президент қарори лойиҳасида ҳам институтда бакалавриат таълим йўналишларида таълимнинг кредит-модуль тизимини босқичма-босқич жорий этилиши хусусида маълумот берилганди. 2021 йил январида эса Ўзбекистондаги ОТМларда ўқув жараёни босқичма-босқич кредит-модуль тизимига ўтказилиши маълум бўлган.
Изоҳ (0)