Ramzan Qodirov Grozniydagi miting ishtirokchilariga minnatdorlik bildirdi. Pandemiya sharoitidagi mazkur yig‘in tashkilotchilari topilmagani uchun hech kim jazolanmaydigan bo‘ldi

Checheniston rahbari Ramzan Qodirov iste’fodagi sudya Saydi Yangulbayevning oilasiga qarshi o‘tkazilgan miting ishtirokchilariga minnatdorlik bildirdi. Qodirovning ta’kidlashicha, Checheniston Respublikasi juda ko‘p jabr ko‘rgan, biroq chechen jamiyatini parchalashga uringanlarning hammasi “bir xil taqdirga duchor bo‘lgan”. U Chechenistonning “tinchligi, dini, sha’ni va totuvligiga tajovuz qilayotganlarni” ham xuddi shunday taqdir kutayotganini aytdi. Ramzan Qodirov qanday taqdir haqida gap ketayotganiga aniqlik kiritmadi.

“Bugun dinga va ekstremistik harakatlarga qarshi aniq va ravshan pozitsiya bilan chiqqan chechen xalqimga o‘z minnatdorchiligimni bildirmoqchiman. Shubhasiz, bugun bu mitingning har bir ishtirokchisi Islom himoyachisiga aylandi”, — deb yozgan Qodirov “VKontakte” ijtimoiy tarmog‘idagi sahifasida.

2-fevral kuni Grozniyda rejalashtirilmagan miting bo‘lib o‘tdi, unda Checheniston aholisi iste’fodagi sudya Saydi Yangulbayevning oila a’zolarini javobgarlikka tortishni talab qildi. Chechen OAVlarining yozishicha, mitingga 400 mingga yaqin odam yoki respublika erkaklarining 50 foizi yig‘ilgan.

“Rospotrebnadzor”ning (Rossiya Iste’molchilar huquqlarini himoya qilish va inson farovonligini nazorat qilish federal xizmati) Checheniston bo‘yicha boshqarmasi Grozniydagi ommaviy mitingda epidemiologik me’yorlarning buzilishi yuzasidan ma’muriy jazo qo‘llamasligini ma’lum qildi. “Rejalashtirilmagan xalq mitingi tashkilotchilarini aniqlashning iloji yo‘q, shuning uchun biz yuridik shaxsning javobgarligi haqida gapira olmaymiz”, — deyiladi boshqarma izohida.

Shu bilan birga, boshqarma “koronavirus yuqtirish holatlarining kuchayishiga yo‘l qo‘ymaslik uchun odamlar gavjum joylarda barcha tegishli profilaktika choralarini qo‘llash” zarurligini eslatdi.

Rossiyaning Ma’muriy javobgarlik to‘g‘risidagi kodeksiga ko‘ra, pandemiya davrida Federatsiya hududida sanitariya qoidalarini buzganlik yuzasidan  jazo yuridik shaxslar uchun bir million rublgacha (13 ming dollar) jarimani yoki 90 kungacha faoliyatini to‘xtatishni nazarda tutadi.