Рамзан Қодиров Грознийдаги митинг иштирокчиларига миннатдорлик билдирди. Пандемия шароитидаги мазкур йиғин ташкилотчилари топилмагани учун ҳеч ким жазоланмайдиган бўлди

Чеченистон раҳбари Рамзан Қодиров истеъфодаги судья Сайди Янгулбаевнинг оиласига қарши ўтказилган митинг иштирокчиларига миннатдорлик билдирди. Қодировнинг таъкидлашича, Чеченистон Республикаси жуда кўп жабр кўрган, бироқ чечен жамиятини парчалашга уринганларнинг ҳаммаси «бир хил тақдирга дучор бўлган». У Чеченистоннинг «тинчлиги, дини, шаъни ва тотувлигига тажовуз қилаётганларни» ҳам худди шундай тақдир кутаётганини айтди. Рамзан Қодиров қандай тақдир ҳақида гап кетаётганига аниқлик киритмади.

«Бугун динга ва экстремистик ҳаракатларга қарши аниқ ва равшан позиция билан чиққан чечен халқимга ўз миннатдорчилигимни билдирмоқчиман. Шубҳасиз, бугун бу митингнинг ҳар бир иштирокчиси Ислом ҳимоячисига айланди», — деб ёзган Қодиров «ВКонтакте» ижтимоий тармоғидаги саҳифасида.

2 февраль куни Грознийда режалаштирилмаган митинг бўлиб ўтди, унда Чеченистон аҳолиси истеъфодаги судья Сайди Янгулбаевнинг оила аъзоларини жавобгарликка тортишни талаб қилди. Чечен ОАВларининг ёзишича, митингга 400 мингга яқин одам ёки республика эркакларининг 50 фоизи йиғилган.

«Роспотребнадзор»нинг (Россия Истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати) Чеченистон бўйича бошқармаси Грознийдаги оммавий митингда эпидемиологик меъёрларнинг бузилиши юзасидан маъмурий жазо қўлламаслигини маълум қилди. «Режалаштирилмаган халқ митинги ташкилотчиларини аниқлашнинг иложи йўқ, шунинг учун биз юридик шахснинг жавобгарлиги ҳақида гапира олмаймиз», — дейилади бошқарма изоҳида.

Шу билан бирга, бошқарма «коронавирус юқтириш ҳолатларининг кучайишига йўл қўймаслик учун одамлар гавжум жойларда барча тегишли профилактика чораларини қўллаш» зарурлигини эслатди.

Россиянинг Маъмурий жавобгарлик тўғрисидаги кодексига кўра, пандемия даврида Федерация ҳудудида санитария қоидаларини бузганлик юзасидан  жазо юридик шахслар учун бир миллион рублгача (13 минг доллар) жаримани ёки 90 кунгача фаолиятини тўхтатишни назарда тутади.