Арманистонда президентлик сайловлари 2022 йилнинг март ойида бўлиб ўтади. Мамлакат парламентининг 65 нафар депутати ушбу лавозимга юқори технологиялар саноати вазири Ваагн Хачатрян номзодини илгари сурган. Бу ҳақда бош вазир Никол Пашинян ҳукумат йиғилишида маълум қилди, деб хабар беради «Интерфакс».
Армен Саркисян истеъфога чиқишини 23 январь куни эълон қилганди, парламент 1 февраль куни унинг қарорини тасдиқлаган. У давлат раҳбарлигидан кетаётганини мамлакат сиёсати, уруш ва тинчлик масалаларига таъсир ўтказа олмаётгани билан изоҳлаган. Президентнинг мажбуриятларини вақтинча Миллий йиғин спикери Ален Симонян бажариб турибди.
Арманистон президенти парламент томонидан етти йил муддатга сайланади. Сайлов республика президенти лавозими вакант бўлган кундан бошлаб камида 25 кундан кейин ва 35 кундан кечиктирилмаган ҳолда ўтказилади.
Ваагн Хачатурян Арманистонни 1991—1998 йилалрда бошқарган Левон Тер-Петросян сиёсий иттифоқчиси ҳисобланади.
Хачатурян 1992—1992 йилларда Ереван мери, 1996—1998 йилларда президент маслаҳатчиси бўлган. 2019 йилдан 2021 йилга қадар арманистонлик йирик тадбиркор, ҳукмрон партиядан парламентга депутат сифатида сайланган Хачатур Сукиасяннинг оиласига тегишли «Армеконбанк» бошқарув аъзоси бўлган. 2021 йилнинг августида Хачатурян юқори технологиялар саноати вазири этиб тайинланганди.
Аввалроқ «Порлоқ Арманистон» партияси раҳбари Эдмон Марукян ва ташқи ишлар вазири Арарат Мирзоян Арманистон президентлиги лавозимига даъвогарлик қилиши мумкинлиги тўғрисида хабар берилганди. «Арманистон» мухолифат фракциясидан бўлган парламент депутати Андраник Теванян Саркисян республикадан чиқиб кетганини маълум қилган. Қатор арман ОАВлари у Лондонда эканини ёзмоқда.
Изоҳ (0)