Armaniston prezidenti Armen Sarkisyan bosh vazir Nikol Pashinyanning taklifiga binoan mudofaa vaziri Arshak Karapetyanni lavozimidan ozod qildi. Uning o‘rniga bosh vazir o‘rinbosari Suren Papikyan tayinlandi. Bu haqda Armaniston prezidenti ma’muriyati matbuot xizmatiga tayanib, “TASS” xabar berdi.
“Prezident Armen Sarkisyan bosh vazirning taklifini asos qilib olgan holda, mudofaa vaziri Arshak Karapetyanni lavozimidan ozod etish to‘g‘risidagi farmonni imzoladi. Prezidentning boshqa farmonlari bilan Suren Papikyan bosh vazir o‘rinbosari lavozimidan ozod qilinib, mudofaa vaziri etib tayinlandi”, — deyiladi xabarda.
Karapetyan shu yilning avgust oyi boshida Armaniston mudofaa vaziri etib tayinlangan edi. Papikyan esa Pashinyanning eng yaqin safdoshlaridan biri va “Fuqarolik shartnomasi” hukumat partiyasining raisidir.
Peruda 2-noyabr kuni ichki ishlar vaziri Luis Barransuela, o‘sha haftada, 8-noyabr kuni esa mudofaa vaziri Uolter Edison Ayala Gonsales iste’foga chiqishini e’lon qilgandi.
11-noyabr kuni Chexiya hukumatining rahbari Andrey Babish va mamlakat hukumati iste’foga chiqdi. Undan avval Shvetsiya bosh vaziri Stefan Lyoven iste’foga chiqish to‘g‘risida ariza bergani, uning o‘rnini ayol kishi egallashi mumkinligi haqida xabar qilingandi.
Avvalroq Kanadada qishloq xo‘jaligi vaziri ichkilikbozlik sabab iste’foga chiqqan, Ukrainada esa bosh vazirning ikki o‘rinbosari o‘z lavozimini tark etgan.
Izoh (0)