Afg‘onistonda 13,1 million bola gumanitar yordamga muhtoj. So‘nggi uch oy ichida mamlakatda yordamga muhtoj bolalar soni 3,1 millionga oshgan. Bu haqda Save the Children xalqaro tashkilotiga tayanib, The Guardian xabar berdi.
Tashkilot vakili Met Tinkler Afg‘onistondagi inqirozli vaziyatni “do‘zaxning o‘zi” deb izohlagan.
Tinklerning aytishicha, 22,8 million afg‘onistonlik “ochlik yoqasida” (Afg‘oniston aholisi 38 million kishiga teng). Xalqaro tashkilot vakilining so‘zlariga ko‘ra, 2022-yil o‘rtalariga borib, mamlakat aholisining 95 foizi kambag‘allik yoqasiga borib qoladi.
2021-yilning dekabr boshida Save the Children Afg‘onistondagi 780 mingga yaqin bola qishda yashash uchun normal boshpanaga ega emasligidan ogohlantirgandi.
Afg‘onistonda “Tolibon” hokimiyat tepasiga kelgach, ko‘plab afg‘on sportchilari qo‘llab-quvvatlash va mablag‘ yetishmasligi sababli faoliyatini yakunlashga majbur bo‘lgan. Afg‘oniston ayni paytda jiddiy gumanitar inqirozga yuz tutmoqda. Mamlakatda millionlab odamlar ochlik yoqasida, oziq-ovqat, dori-darmon va boshqa zarur mahsulotlar yetishmovchiligi hukm surmoqda.
26-yanvar kuni BMT bosh kotibi Antoniu Guterrish xalqaro hamjamiyatni Afg‘onistonni falokatdan qutqarish uchun mamlakatga gumanitar yordamlarni ko‘tarishga chaqirgan edi. Guterrish millionlab afg‘onlar ochlikdan aziyat chekayotgani, ta’lim va sog‘liqni saqlash tizimlari barbod bo‘lish arafasida turgani uchun “qutqaruv” operatsiyalarini cheklovchi har qanday qoida va shartlar to‘xtatilishi kerakligini ta’kidlagandi.
BMTning gumanitar masalalarni muvofiqlashtirish boshqarmasi 2022-yil yanvariga qadar Afg‘onistonda davom etayotgan gumanitar inqirozni hal etish uchun 1,5 milliard dollarga yaqin mablag‘ to‘plagan. Ushbu mablag‘lar qisman afg‘onlarni qishga tayyorlash, jumladan, naqd pul va nooziq-ovqat mahsulotlarini to‘g‘ridan to‘g‘ri taqsimlashni qo‘llab-quvvatlash uchun sarflangan.
Avvalroq O‘zbekistonning Afg‘onistonga yuborgan insonparvarlik yordamini topshirish marosimi bo‘lib o‘tgani, Xitoy Afg‘onistonga 800 ming doza vaksina yetkazib bergani, Jahon banki Afg‘onistonni qo‘llab-quvvatlash uchun 280 mln dollar mablag‘ ajratishi to‘g‘risida xabar berilgandi.
Izoh (0)